En Dënschdeg de Moie koum et op der A13 Richtung Schengen virun der Jonctioun Lankelz zu engem méi uergen Accident. Am Trafic-Info vum ACL war ze liesen, dass fënnef Autoen an ee Camion an den Accident verwéckelt waren. Vun der Police krute mer dräi Autoen an ee Camion confirméiert, iwwerdeems am Bulletin vum CGDIS just nach vun zwee Autoen an engem Camion rieds ass.
Wéi d’Police weider matdeelt, goufen dräi Persoune verwonnt. Eng dovunner huet mussen aus dem Auto geschnidde ginn. Wéi uerg déi Persoun blesséiert war, konnt op Nofro hin nach net definitiv matgedeelt ginn.
Deen Accident huet natierlech fir gréisser Perturbatiounen am Beruffstrafic gesuergt. Zäitweis waren all d’Spueren op där Plaz blockéiert.
D’Pompjeeë vun Esch a Schëffleng waren op d’Plaz geruff ginn, grad ewéi Ambulanze vun Esch, Suessem-Déifferdeng an aus der Stad.
En Dënschdeg de Moie géint 9.15 Auer sinn zu Koplescht en Auto an e Bus net laanschtenee komm. Eng Persoun gouf verwonnt. Am Asaz waren d’Pompjeeë vu Koplescht an eng Ambulanz vu Mamer.
