Am Feierowendtrafic en Donneschdeg huet den ACL gemellt, dass um Fridhaff bei Dikrech e Bus géif brennen. De CGDIS deelt dann och mat, dass dat géint 17:25 Auer de Fall war. Detailer ginn net genannt, ausser dass d'Pompjeeë vun Angelduerf an aus der Nordstad op d'Plaz geruff goufen, fir ze läschen. Och eng Ambulanz war op der Plaz, woubäi awer zum Gléck kee blesséiert gouf.
En RTL Mobile Reporter hat eis eng Foto geschéckt vun enger grousser Dampwollek iwwer Dikrech, mat der Informatioun, dass de Brand op engem Busdepot um Fridhaff war. Do hu mer dann um Freideg de Moien och de verbrannte Bus fonnt.
