Vill EmotiounenDéi Gréng: Henri Kox als neie Logementsminister confirméiert

RTL Lëtzebuerg

Eppes hunn déi Gréng op hirem Kongress kloer gemaach. Si loosse sech vun den aktuelle Réckschléi net ënnerkréien.

Update: 04.10.2019 00:03

Kämpferesch an emotional war de Kongress vun déi Gréng en Donneschdeg den Owend am Tramsschapp um Lampertsbierg. Eng 270 Leit waren am Sall a si hu mat ecrasanter Majoritéit dofir gestëmmt, datt den Henri Kox an d'Regierung noréckelt an do d'Funktioune vum Logementsminister a vum delegéierte Minister fir d'Defense an d'bannenzeg Sécherheet iwwerhëlt.

Direkt am Ufank vum Kongress huet de Parteipresident Christian Kmiotek sech un de Felix Braz adresséiert, fir him eng gutt Besserung ze wënschen.

De Christian Kmiotek seet "Merci Felix"

Op dem aussergewéinleche Kongress gouf och iwwert de Felix Braz geschwat.

Genee dat hunn och all d'Leit am Sall gemaach, si hunn eng Kaart fir hire Kolleg ënnerschriwwen.

Emotional Momenter: Gedenken u Camille Gira, a Gedanke beim Felix Braz

Déi lescht Woche wiere bal net z'erdroe gewiescht, sot en opgewullte François Bausch, deen drun erënnert huet, datt d'lescht Joer am Mee mam Camille Gira ee vu senge beschte Frënn gestuerwen ass.

François Bausch: Schwéier Momenter an haart Wochen

De grénge Minister iwwert de Camille Gira an de Felix Braz.

Och den zukünftege Minister Henri Kox huet mat den Tréine gekämpft.

Henri Kox: Ëmstänn dinn och mir wéi

Den neie Logementsminister iwwert de Camille Gira an déi aktuell Situatioun.

Elo wier et un him Verantwortung z'iwwerhuelen a weiderschaffen, huet och d'Presidentin Djuna Bernard gesot. Dat wier sécher am Sënn vum Felix Braz.

Affär Traversini: Tréinen a Roserei um grénge Kongress

D'Evenementer zu Déifferdeng koumen natierlech och zur Sprooch. Et wiere Feeler geschitt, wat keen ofstreit. Am Contraire. Et misst een dofir Suergen, datt esou eppes net méi virkënnt, esou de François Bausch.

François Bausch: Aus Kris Traversini léieren

Et muss ee sech d'Froe stellen, wisou datt geschitt. D'Partei muss elo alles maachen, fir datt esou eppes net méi virkënnt.

Den neie grénge Vizepremier huet sech genee wéi d'Parteimemberen am Sall hannert d'Carole Dieschbourg gestallt huet.

François Bausch: Carole bis zum leschten ënnerstëtzen

Den neie Vizepremier ass sech sécher, datt d'Ëmweltministesch sech näischt virzewerfen huet.

Et géif den Ament vill mat Ënnerstellunge geschafft, ma e Beweis fir Favoritismus géif et net ginn. D'Parlament géif quasi zu enger ëffentlecher Justizveranstaltung ginn. Natierlech, esou de François Bausch, kéint ee versichen, dat nozehuelen, wat engem an de leschte 5 Joer net gelongen ass.

François Bausch: Rosen op d'Oppositioun

Esou Versich, wéi an der lescht, d'Regierung an d'Partei auserneen ze bréngen, bréngt d'Oppositioun och net zeréck an d'Regierung.

Och de Parteipresident Christian Kmiotek war opbruecht, esou wéi dës Situatioun vu verschiddene Leit an d'Ëffentlechkeet bruecht gëtt.

Christian Kmiotek: Opbruecht an der Affär Traversini

Grad iwwer d'Reaktioun vun der CSV ass de Parteipresident vun déi Gréng alles anescht, wéi begeeschtert.

"All déi, déi dovun dreemen, datt d'Regierung ausernee fält, solle weider dreemen" mat deene Wieder ass dem François Bausch seng Interventioun op en Enn gaangen.

François Bausch: Si solle weider dreemen

...

Kongress vun Déi Gréng / Reportage Dany Rasqué

Vill Changementer bei déi Gréng

D'Semiray Ahmedova an d'Chantal Gary réckelen automatesch an hir nei Funktioun an der Lëtzebuerger Politik. D'Semiray Ahmedova réckelt fir de Roberto Traversini an d'Chamber no. D'Chantal Gary iwwerhëlt de Poste vum Henri Kox.

LINK: D'Detailler vun de Changementer

The photos published on this site are subject to copyright and may not be copied, modified, or sold without the prior permission of the owner of the site in question.