E Freideg de Mëtten hunn de CSV-Finanzminister Gilles Roth an den DP-Wirtschaftsminister Lex Delles de sougenannte "Future Fund 3" virgestallt. D’national Kredit- an Investissementsgesellschaft SNCI an den europäeschen Investitiounsfong investéieren am Ganzen 270 Milliounen Euro an dee Fong.
Mat deene Sue sollen an aner Fongen investéiert ginn, fir Start-Uppen a kleng- a mëttelgrouss Entreprisen ze finanzéieren. Dat a Beräicher an deenen d’Lëtzebuerger Wirtschaft wuesse soll, zum Beispill a Gesondheetstechnologien, Weltraumtechnologien oder de Logistik-Secteur. Iwwert d’Future Funds 1 an 2 waren 263 Milliounen Euro investéiert ginn. Et ass awer net kloer, wéi vill Entreprise genee dovunner profitéiert hunn.
