Dës Woch kucke mir eis d'Regioun laanscht d'Musel méi genee un. Den Oste vum Land ass virun allem fir seng Wäikultur bekannt - ëmmerhin ass et bekannterweis hei, datt d'Rief esou dofteg bléit an den Himmel ons Wäi mécht. D'Wäibierger kann ee sech net just gutt op Wandertouren ukucken, et kann ee se och direkt vun engem vun de Muselschëffer aus bewonneren.
Ma un der Musel gëtt et net just gudde Wäin ze drénken. Wärend Schengen als Gebuertsplaz vun der europäescher Iddi international bekannt ass, ass d'Welleschter Kiermes virun allem bei Lokalmatadore beléift. Maacher huet de Päiperleksgaart a Waasserbëlleg den Aquarium. Ma och soss gëtt et an de Stroosse laanscht d'Musel vill ze entdecken, wéi Dir op eise Fotoe wäert gesinn.
De Fotograf Domingos Oliveira war fir RTL laanscht d'Musel ënnerwee an huet déi schéinsten Ausbléck a Gebaier festgehalen. All Dag fannt Dir hei eng Galerie vun enger neier Plaz.
