D'Mataarbechter vun der Firma Hacktron hunn e Freideg erkläert, si hätten eng Sécherheetslacune am Hëllefsforum vun OpenAI opgespiert. Doriwwer hätte si d'Kontroll iwwer sëllege Konte vun Open-AI-Mataarbechter fir den Chatbot ChatGPT kritt. Hacktron sot awer och, dass een déi Schwaachstell schonn Enn Juli "direkt" gemellt hat. Zesumme mat OpenAI hätt een un enger Léisung vum Probleem geschafft.
OpenAI huet erkläert, d'Sécherheetslück wier bannent Stonnen no der Meldung nees zou gewiescht. D'Firma ënnert der Leedung vum Sam Altman huet den Hacktron-Mataarbechter eng Belounung an Héicht vu 6.500
Dollar fir hiren Hiweis ausbezuelt. "Mir soen de Fuerscher Merci, dass si eis kontaktéiert hunn an hir Erkenntnisser mat eis gedeelt hunn", heescht et vun OpenAI.
Et hätt een eegenen Aussoen no de KI-Modell Claude Opus vun Anthropic benotzt, wéi Hacktron weider erkläert huet. Bannent ronn dräi Stonne wier d'OpenAI-Säit gehackt gewiescht. Antëscht huet Anthropic mat Mythos en däitlech méi leeschtungsfäege KI-Modell verëffentlecht. Mythos steet awer bis ewell nëmmen eng ageschränkte Krees vu Cyberofwier-Organisatiounen zur Verfügung.
Hacktron no fënnt een déi opgespierte Sécherheetslacune an der Software bei ville Firmen. Dorënner Slack an och Meta.
Wéinst de Risiken vun der Kënschtlecher Intelligenz hu sëllege Cheffe vu grousse KI-Entreprisen viru kuerzem fir eng méi lues Entwécklung vun der Technologie opgeruff. Dorënner den Anthropic-Chef Dario Amodei an den OpenAI-Chef Altman.
