De “Galaxy Z TriFold” wäert den 12. Dezember an d’Vente goen. Mat engem Präis vun 2.443 $ wäert en duebelt esou deier sinn, wéi den iPhone 17 a sech net un den duerchschnëttleche Konsument riichten. De Vizepresident vu Samsung Alex Linn huet dann och matgedeelt, dass et sech ëm e spezielle Produit handelt, deen net fir de Grand public geduecht wier.
De Smartphone huet, wann e ganz ausgeklappt ass, eng Bildschierm-Diagonal vu 25,4 Zentimeter, dat bei engem Gewiicht vun 309 Gramm. Op der dënnster Plaz ass de “Z Trifold” 5 Millimeter héich.
De Smartphone soll sech besonnesch u Leit riichten, déi op dësem wëlle schaffen. Et ass dann och eng Kënschtlech Intelligenz installéiert, déi engem bei Probleemer oder Froe soll hëllefen.
D’Annonce vum “Galaxy Z Trifold” kënnt kuerz nodeems déi leschte weltwäit Verkafszuele suggeréieren, dass Apple Samsung am Laf vum Joer 2029 als weltwäit gréisste Smartphone-Produzent kéint ofléisen. Iwwerdeems hale sech zanter Längerem Rumeuren, dass Apple d’nächst Joer sengersäits e Smartphone, deen ee kann diebelen, erausbréngt. Scho viru Samsung hat iwwerdeems Huawei e Smartphone mat dräi Ecrane presentéiert.
