D'Presidentin vun der DP war e Mëttwoch de Moien eis Invitée vun der Redaktioun.

"Bei eis sinn et net just Sloganen, mir setzen dat och ëm wat mer verspriechen...", dat sot d'Corinne Cahen e Mëttwoch de Moien als eis Invitée vun der Redaktioun.

D'DP-Presidentin ass der Meenung, dass vill Facteure matgespillt hätten, dass déi Liberal sou gutt bei den Europawalen ofgeschnidden hätten. Ee Grond wier awer ganz sécher och déi national Politik, déi gutt géif bei de Leit ukommen, seet d'Corinne Cahen. Et géif bei der DP net just eidel Wieder ginn an et hätt een e bëssen den Nerv vun der Zäit getraff mat, zum Beispill enger moderner Familljepolitik.

Genee dee Ressort huet d’Corinne Cahen jo och an der Regierung.

An do géif ee weider d’Devise fueren, dass een d’Onofhängegkeet vun den Elteren wéilt fërderen. Et wier hautdesdaags einfach net méi zäitgeméiss, dass een entweder schaffen geet oder Kanner kritt. Et muss haut méiglech sinn, schaffen ze goen, Kanner ze kréien an och qualitativ Zäit mat hinnen ze verbréngen, seet d’Ministesch, déi och seet, dass d’Resultater där Politik géife Recht ginn. D’Echoe vun villen Eltere wiere ganz positiv.

AUDIO: Invité vun der Redaktioun: Corinne Cahen

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.