E Mëttwoch de Moie war d'DP-Deputéiert Joëlle Elvinger eis Invitée vun der Redaktioun.

Et ass e spannend Mandat an enger europäescher Institutioun als iwwerzeegten Europäerin, dat sot d'Joëlle Elvinger um Mëttwoch de Moien.

D'DP-Deputéiert wiesselt fir den 1. Januar op den Europäesche Rechnungshaff. Si iwwerhëlt de Poste vum Henri Grethen. Si hätt Interessi deklaréiert gehat. Si hätt entretemps eng gewëss Experienz an den ëffentleche Finanzen gesammelt.

Datt de Claude Lamberty sollt an d'Chamber noréckelen, hätt näischt mat hirer Decisioun ze dinn. Et wär hire fräie Choix gewiescht. Si wär bei de Wale gewielt ginn an hätt dat Mandat och fäerdeg gemaach. Onofhängeg wien noréckelt.

Wéinst dem Wiessel muss d'Joëlle Elvinger awer elo natierlech hir national- a lokalpolitesch Karriär un den Nol hänken, d'Affekotin muss sech och um Barreau ofmellen.

Op en Artikel am Lëtzebuerger Land ugeschwat, präziséiert d'Joëlle Elvinger, datt et keen Interessekonflikt wéinst Participatiounen u Societéite géing ginn.

Si hätt keng Bedeelegung u kommerzielle Gesellschaften, mä just un enger société civile immobilière, déi zwou Immobilien hätt, an hirer Famill géing gehéieren. Si hätt do eng nue propriété vun engem Drëttel vun de Parten.

Déi Participatiounen hätte bei der Chamber net missten deklaréiert ginn, um Rechnungshaff wier dat anescht, ma dat wier kee Problem.

Den europäesche Rechnunghshaff iwwerpréift, ob de Budget vun den EU-Programmer korrekt ëmgesat gëtt. D'Feelerquot läit bei ronn 2%. Eemol d'Joer gëtt e grousse Joresrapport presentéiert. Derbäi kommen eng 30 bis 40 Spezialrapporten d'Joer. D'Recommandatioune vum Rechnungshaff géingen dacks berécksiichtegt ginn.

Invité vun der Redaktioun: Joëlle Elvinger

Rendez-vous fir den Interview mam Invité vun der Redaktioun all Dag vu méindes bis donneschdes um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.