E Mëttwoch de Moie war den Direkter vun der UEL eisen Invité vun der Redaktioun.

D'Ekonomie brauch zwee Joer bis se nees do ass, wou se virun der Kris, also 2019, stoung, och wann déi wirtschaftlech Aktivitéit d’nächst Joer nees unzitt. Dat sot de Jean-Paul Olinger vum Patronats-Verband UEL am RTL-Interview e Mëttwoch de Moien.

D’UEL seet sech wéinst den héijen Infektiounszuelen net weider iwwerrascht, datt och hei am Land hei Covid-Restriktioune kommen.  Et wier een och frou, datt d’Regierung hei am Land méi laang gewaart hätt fir dee Schrëtt ze goen an et géif jo och net alles zou goen. Nawell missten d’Horesca, den Evenementiel an d’Kultur zousätzlech vun der Regierung gehollef kréien. An zwar elo direkt an net réischt am Januar.

D’UEL hofft, datt besonnesch d'Indépendanten zousätzlech ënnert Äerm gegraff kréien. Deementspriechend Gespréicher géife lafen.

D’UEL gleeft nach ëmmer un déi wirtschaftlech Relance d’nächst Joer a waart deementspriechend op de Vaccin. Fir den Ament geet den Direkter vun der Union des entreprises luxembourgeoises, grad wéi de Statec dovunner aus, datt et am Mäerz nees unzitt.  Et sollt een awer mengen, datt et da besser ass.

E groussen Deel vun der Relance, géif absolut um Chômage partiel baséieren. Dee géif de Leit och hëllefen, hir Kafkraaft ze halen an den Entreprisë fir Mataarbechter ze halen.
Sou de Jean-Paul Olinger vun der UEL dee fir cibléiert Hëllefe plädéiert. Si missten sou laang wéi néideg an sou kuerz wéi méiglech bestoe bleiwen.

Et ass net den Ament fir de Mindestloun ze héijen

Kategoresch dogéint ass den Daachverband vum Patronat géint déi annoncéiert Hausse vum Mindestloun vun 2,8 Prozent op den 1. Januar, déi de Premier e Freideg an Aussiicht gestallt hat. Et wier falsch ze mellen, datt een de Logementsproblem zu Lëtzebuerg duerch eng Hausse vum Mindestloun geléist géif kréien, sou de Jean-Paul Olinger de Moien. D’Regierung géif och wëssen, datt et de falschen Zäitpunkt fir d’Hausse wier dowéinst hätt se jo och Kompensatiounen an Aussiicht gestallt.

Zanter 2000 wier de Mindestloun ëm 1000 Euro eropgaangen.  Failliten an Aarbechtsplazverloschter wieren duerch déi weider Hausse net auszeschléissen. Kleng- a  mëttelstänneg Betriber géifen zousätzlech an den Eck gedréckt ginn. D’UEL fuerdert carrément d’Regierung sollt hire Projet de loi zeréckzéien. Wann een et dat an dëser Kris net géif froen, da misst ee sech froe wéini soss.

De Sozialdialog funktionéiert mä mir brauchen elo keng national Tripartite

Wat de Sozialdialog am Land ugeet, sot de Patronatsvertrieder Jean-Paul Olinger, datt déi sektoriell Tripartitte gutt fonctionéiere géifen. Eng national Tripartite wier kuerzfristeg net néideg.

Et wiere sécher animéiert Reuniounen tëscht de Sozialpartner am Comité permanent du travail et de l’emploi wou och alt nei Iwwerraschunge kéime vum Aarbechtsminister Dan Kersch.
D'Fuerderungen déi diskutéiert ginn, kéimen dacks vun de Gewerkschaften a vum Aarbechtsminister a ginn der UEL ze wäit.

Dës géifen d'Entreprisen nämlech gären iwwert d'Aarbechtsrecht an en, Zitat „Korsett“ ze drécken. Dobäi wier et grad wichteg fir d'Lëtzebuerger Ekonomie an hier Kompetitivitéit, fir an deem Kontext flexibel ze bleiwen.

Invité vun der Redaktioun: Jean-Paul Olinger

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.