E Méindeg de Moie war d'Gesondheetsministesch eis Invitée vun der Redaktioun.

Eis Zuelen evoluéieren sou wéi mir eis dat virstellen, ma mir sinn nach net do ukomm wou mer hi wëllen. Dat seet d'Gesondheetsministesch Paulette Lenert. Si war e Méindeg de Moien d'Invitée vun der Redaktioun.
Ënner 200 Nei-Infektiounen den Dag an en taux de positivité vu manner wéi 3% bei den Ordonnance-Tester. Dat si Seuilen, déi een elo mol misst upeilen.

Leider géingen et an der aktueller Situatioun vill Inconnuen a Riske ginn, seet d'Ministesch a verweist zum Beispill op d'Feierdeeg. Et wieren och vill Leit gereest an der Chrëschtvakanz, wat hir Suerge géing maachen.

A enger bis zwou Woche wéisst ee méi. Ob a wéi déi aktuell Covid-Mesuren verlängert ginn, dat géing d'Regierung lo déi nächst Deeg kucken. Et wier awer kloer, datt elo net all d'Mesuren elo all géinge méi labber gemaach ginn, d'Situatioun wier ugespaant.

Déi brittesch Variant, déi jo vill méi ustiechend soll sinn, kéint der Pandemie eng nei Dynamik ginn. Do misst een lo déi genee Analysen ofwaarden, sou d'LSAP-Ministesch.

Datt d'EU bei der Commande vun de Vaccine verbockt hätt, dat wier einfach gesot, et hätt een op méi Päerd gesat, sou d'Paulette Lenert. Fir op eege Fauscht Vaccinen ze organiséieren, wier och schwiereg ginn. D'EU-Memberlänner hätte sech engagéiert, fir net parallel zu der Kommissioun ze verhandelen an all Impfstoff misst souwisou vun der europäescher Medikamentenagence autoriséiert ginn.
 
Bis Enn Mäerz sollen zu Lëtzebuerg 36'000 Leit mam Produit vu Biontech/Pfizer kënne geimpft ginn. Deemnächst kéinte Moderna an AstraZeneca eng Zouloossung kréien. Beim amerikanesche Produzent Moderna huet de Grand-Duché Dose fir 50'000 Leit bestallt, beim britteschen Acteur AstraZeneca gouf Impfstoff fir 200'000 Mënsche bestallt.

Déi aktuell Phas mam Fokus op d'Santéspersonal an op d'Alters- a Fleegeheemer wäert 2-3 Méint daueren. Wéi déi nächst Phasen- a wéi och d'Kategorie genee wäerten ausgesinn, do géing nach eng definitiv Strategie zesumme mam Ethikrot ausgeschafft ginn.

Si wier zouversiichtlech, datt d'Impfbereetschaft zu Lëtzebuerg nach wäert eropgoen, sou d'Ministesch. Do misst een eng gutt Kommunikatioun maachen a Vertraue schafen.

Vun ëffentlecher Säit aus wier net virgesinn, datt en Ënnerscheed tëscht geimpfte Leit an net-geimpfte Leit géing gemaach ginn.

Invité vun der Redaktioun: Paulette Lenert

Frank Engel schwätzt vu Versoen

D'EU an och d'Lëtzebuerger Regierung hu beim Vaccin versot. Dat schreift den CSV-President Engel op sozialen Netzwierker.

D'EU hätt wuel vill ze spéit a vill ze wéineg Impfstoff vu Biontech/Pfizer bestallt, schreift den CSV-Chef a berifft sech op de rezenten Artikel am däitsche Spiegel. Dobäi wieren et wuel d'Staaten déi versot hätten an déi Produiten aus Frankräich bestallt hätten, déi réischt Enn 2021 kéimen.

Lëtzebuerg hätt kënnen- an hätt missten op eege Fauscht bestellen. 17 Milliounen hätt et kascht, wann all Resident mam Biontech-Produit geimpft gi wier. Déi éischt Phas vum large scale testing hätt méi wéi duebel sou vill kascht.
Och bei anere Produzenten hätt kënne méi bestallt ginn, sou de Frank Engel, de Käschtepunkt wier net de Problem gewiescht.

Hie géif d’Gefill net lass ginn, datt d’Regierung et hei einfach ganz zolidd vermasselt hätt, esou nach de Parteichef vun der gréisster Oppositiounspartei.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.