En Donneschdeg de Moie war de President vun der Chamberkommissioun Santé eisen Invité vun der Redaktioun.

Nieft der Impfung kéint een och negativ getest ginn oder erëm gesond sinn, fir méi Fräiheeten ze hunn.

De Covid-Certificat ass e Choix a keen Zwang oder eng Diskriminéierung, sou de President vun der Chamber Santéskommissioun, den LSAP-Deputéierte Mars Di Bartolomeo den Donneschdeg de Moien hei op RTL. De Covid-Certificat - oder "3G Certificat", wéi de Mars Di Bartolomeo en nennt fir "geimpft, getest oder gesond" – soll de Leit méi Fräiheete ginn. Op d’Ausso, datt de Certificat dach eng Impfflicht zur Hannerdier wier, huet de Mars Di Bartolomeo mat enger Fro geäntwert: "Firwat versteift Dir Iech do drop, aus deem 3G en 1G ze maachen?" De Certificat géing net eleng um Impfen hänken, well "hannendrun hänken déi Méiglechkeeten, déi et elo scho gëtt", huet de Mars Di Bartolomeo betount. Dem Deputéierten no misst een och als positiv ugesinn, datt Europa sech koordinéiert an et soll een net "dat klengt Déierchen" siche goen. Hien huet drun erënnert, datt d’Pandemie eng Kris wier, déi een nach ni gehat hätt, also misst och hei Solidaritéit gëllen.

Well eng Rei Leit, Jonker, nach keng Geleeënheet haten, fir geimpft ze ginn, kéinte si op gratis zertifiéiert Tester zeréckgräifen, déi d’Gemengen ubidden, sou de Mars Di Bartolomeo. Et hätt een elo nach 3 Wochen Zäit bis zum neie Covid-Gesetz, wou ee misst deene Leit entgéintkommen, déi nach net konnte geimpft ginn.

Weideren Deconfinement a Siicht

Opgrond vun de relativ gudde Covid-Zuelen huet de Rapporter vun de Covid-Gesetzer den Donneschdeg de Moien dann och Ouverturen oder méi labber Restriktioune fir nom 12. Juni an Aussiicht gestallt. Zwar huet hie gewarnt, et misst een "déi béis Iwwerraschung" vum leschten Hierscht am Hannerkapp halen, well deemools d’Neiinfektiounen an d’Luucht gaange sinn, nodeems d’Mesurë méi labber gi waren. Hie géing awer mengen, datt d’positiv Entwécklung vun den Zuele sech wäert bestätegen an dowéinst Mesurë géingen ergraff ginn, "fir de Leit d’Liewe méi einfach ze maachen."

Ob d‘Obligatioun vu Schnelltester am Horeca-Secteur opgehuewe gëtt, dat kéint hien net soen, sou de Mars Di Bartolomeo. Déi betraffe Secteuren, d’Chamber an d’Regierung géingen dat zesummen am Dialog decidéieren. D’Ofschafe vun der Ausgangsspär wier och "eng Optioun". Mee och do géing een op "de leschte Moment" waarden, fir ze kucken, ob d‘Zuele sech bestätegen. Wichteg wier, datt all d’Mesuren "gutt duerchduecht, einfach an novollzéibar" sinn.

Pharmaindustrie

Ugeschwat op Kritiker, déi soen, hannert der Impfcampagne stécht vill Geld fir d’Pharmaindustrie, sot de Mars Di Bartolomeo, éischtens et misst ee selwer rechnen, wéi vill Risiko den Impfstoff a wéi vill Risiko de Virus duerstellen. Et wier eng Fro vun eegener Verantwortung a Verantwortung géigeniwwer deenen aneren.

Donieft sot de fréiere Gesondheetsminister, d’Pharmaindustrie kéint ee just mat enger concertéierter Demarche "an de Grëff" oder "un d’Léngt" kréien. Dorop opmierksam gemaach, datt seng Partei, d’LSAP, sech awer géint d’Ophiewe vun de Patenter fir d’Impfung ausgeschwat huet, sot hien, et kéint een "net aus der Hëft schéissen". Et kéint op jiddwer Fall net sinn, datt ee sech mat der Kris eng gëllen Nues verdéngt, sou de Mars Di Bartolomeo.

Invité vun der Redaktioun: Mars Di Bartolomeo

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.