Wann de Summer méi no kënnt, ass dat eng perfekt Geleeënheet, fir sech Zäit fir sech selwer ze huelen an iwwer säi berufflecht Liewen nozedenken. Dës Auszäit kann nei Wënsch ausléisen: an der Karriär virukommen, nei Kompetenzen entwéckelen oder souguer d'Richtung ganz änneren.
Dës Iwwerleeunge kënnen a verschiddene Phase vun engem beruffleche Parcours relevant sinn. Wann e Besoin fir eng Ännerung entsteet, ass et wichteg, sech gutt ze informéieren, fir datt ee weess, wou een ufänke soll.
Ob Salarié, a berufflecher Ëmschoulung oder op Aarbechtssich, a sengem Parcours weiderzekommen, heescht net onbedéngt, bei Null unzefänken. Haut gëtt et vill Léisunge fir ze léieren, virunzekommen an e Projet opzestellen, deen op engem seng Situatioun zougeschnidden ass.
Fir a senger Karriär virunzekommen, ass den éischte wichtege Schrëtt dacks, déi Formatiounen ze fannen, déi dem beruffleche Projet entspriechen. Nei Kompetenze kréien, seng Expertis an engem bestëmmte Beräich stäerken oder en neie Beruff léieren, ka vill Perspektiven opmaachen: Et muss een awer wëssen, wou ee siche soll a wéi een eng Formatioun fënnt, déi den Ziler, dem Niveau an den Ëmstänn entsprécht.
lifelong-learning.lu, d'nationaalt Portal fir liewenslaangt Léieren, dat vum INFPC geréiert gëtt, ass den zentralen Zougangspunkt fir Informatiounen a fir den Opbau vun Ärem Formatiounsprojet zu Lëtzebuerg.
Op dëser Plattform si méi wéi 13.000 Formatioune referenzéiert, déi vun de ronn 330 Formatiounsinstituter, déi Member vun der Plattform sinn, ugebuede ginn. Et gëtt eng Villfalt vu Beräicher am Zesummenhang mat transversalen a beruffsbezunne Kompetenzen, wéi Sproochen, IT, Software, kënschtlech Intelligenz, Finanzen, Management a perséinlech a berufflech Entwécklung, ofgedeckt.
Dank der Sichmaschinn vum Portal kënnen d'Formatiounen, déi den individuelle Bedierfnesser entspriechen, einfach mat Hëllef vu prezise Filteren identifizéiert ginn: Formatiounsberäich, Unterrechtssprooch, Zilniveau, Zäitpläng, Plaz oder Organisatiounsform (Presenzunterrecht, E-Learning oder Blended Learning).
D'Portal bitt och eng Sich no Beruff un, wat besonnesch nëtzlech ass, fir Formatiounen am Zesummenhang mam jeeweilege Beruff ze identifizéieren an doduerch déi entspriechend Kompetenzen ze entwéckelen oder d'Diplomer ze entdecken, déi een iwwer d'Weiderbildung am Zesummenhang mat deem Beruff kréie kann.
Well all Situatioun anescht ass, ass d'Formatiounsoffer a verschiddene Formater verfügbar, fir sech un d'Ëmstänn an d'Disponibilitéit vu jidderengem unzepassen. Owescoursen, Dagescoursen, gewënschten Niveau, Fernunterrecht oder Formatiounen a verschiddene Sproochen: Dëst sinn alles Méiglechkeeten, déi et erlaben, säin eegene Formatiounsparcours opzebauen.
Fir Formatiounsprojeten ze ënnerstëtzen an d'Beruffsliewe besser mam Alldag ze vereenen, kënne verschidde Bäihëllefen am Formatiounsberäich ugefrot ginn.
Dozou gehéiert den individuelle Formatiounscongé, deen et ënner bestëmmte Konditiounen erlaabt, Congésdeeg ze huelen, fir eng individuell Formatioun ze suivéieren. Dat kann eng attraktiv Léisung fir Salariéë sinn, déi hir Kompetenze weiderentwéckelen oder sech op eng Evolutioun an hirer Karriär virbereede wëllen.
Eng aner Méiglechkeet ass d'Validation des acquis de l’expérience (VAE), déi et erlaabt, d'Kompetenzen, déi een duerch seng berufflech an ausserberufflech Erfarung krut, unerkennen ze loossen, fir en Diplom oder en Deel dovun oder Zougang zu enger Formatioun ze kréien.
Fir dës Hëllefe besser ze verstoen an déi ze identifizéieren, déi der individueller Situatioun entspriechen, organiséiert den INFPC reegelméisseg an Zesummenaarbecht mam Ministère fir Educatioun, Kanner a Jugend an de Beruffschambere gratis Informatiounsveranstaltungen iwwer d'Bäihëllefe fir d’Weiderbildung an d'VAE.
An der Karriär virukommen heescht net onbedéngt, datt ee vun engem Dag op deen aneren alles ännere muss. Eng nei Kompetenz entwéckelen, un enger Formatioun/Weiderbildung deelhuelen, seng Erfarung unerkenne loossen oder nei Perspektiven entdecken, ka schonn e konkreete Schrëtt sinn. Egal wéi de Parcours oder d'Situatioun ausgesäit, et gëtt accessibel Léisungen, fir am eegenen Tempo virunzekommen an no an no e beruffleche Projet opzebauen, dee mat engem sengen Aspiratiounen iwwereneestëmmt.
Fir d'Formatiounsméiglechkeeten ze entdecken an déi ze fannen, déi Äre Besoinen entsprécht, gitt op lifelong-learning.lu.
