An de Bongerten am ganze Land wiisst lokaalt an ongesprëtzten Uebst, dat awer leider dacks net méi verwäert gëtt. Fir all déi, déi op der Sich no Uebst sinn oder es ofzeginn hunn, gëtt et elo eng praktesch a gratis Léisung: kierfchen.lu.
Hei kann een erausfannen, wou Uebst fräi gepléckt oder ofkaaft ka ginn. Donieft kënne Benotzer och Annonce schalten – entweder fir Uebst ofzeginn oder well se selwer no enger bestëmmter Quantitéit sichen. Bei kierfchen.lu ka jidderee matmaachen: egal ob een e ganze Bongert oder just eenzel Beem am Gaart stoen huet.
Am Géigesaz zur Aktioun „Gielt Band“ vum Landwirtschaftsministère, wou een d’Uebst ouni Récksprooch mam Proprietär vun de Beem plécke kann, bitt kierfchen.lu d’Méiglechkeet, nach eppes fir säin Uebst ze kréien. Natierlech kann een säin Uebst och tauschen oder gratis ofginn. D’Proprietären hunn z.B. d’Méiglechkeet hiert Uebst scho gepléckt unzebidden a musse keen Accès bei hier Beem erlaben.
Och Produzenten a Restauranten, déi lokaalt Uebst weiderverschaffen, sinn um Portal vertrueden. Donieft fënnt een och Annoncë fir Beiestellplazen oder fir de Verkaf an d‘ Verpachtung vun Terrainen. Bei kierfchen.lu geet et net nëmmen ëm d’Uebst selwer, mee et soll och gewise ginn, wéi vill Produkter aus dem Bongert kommen, an dat souwuel direkt (z.B. Jus, Gebeess) wéi och indirekt (z.B. Schofswoll, Hunneg).
Bei Kierfchen.lu fënnt een och Eventer an Aktivitéite ronderëm de Bongert. Hei fënnt een ënnert anerem Uebstbam-Schnëttcoursen a regional Viz- a Quetschefester. Den Natur- & Geopark Mëllerdall invitéiert zum Beispill all Joer am Oktober op de „Mount vum Bongert“. Dobäi ginn eng Rëtsch Aktivitéiten ugebueden an doriwwer eraus och a Kooperatioun mat verschiddene Restaurante speziell Bongerte-Menü’en proposéiert, déi ee sech ka schmaache loossen.
Ween méi iwwer Bongerte well gewuer ginn, dee kann sech um Site vu kierfchen.lu informéieren a fir de Newsletter umellen, den all dräi Méint verschéckt gëtt. Dësen informéiert iwwer aktuell Themen a saisonal Aarbechte ronderëm d‘Uebstbeem.
Hutt dir iech scho mol gefrot wéi eng Äppelzort sech fir wat am Beschten eegent? Dës a weider spannend Informatioune ginn et an der Serie Kurioses am Natur- & Geopark Mëllerdall an op kierfchen.lu.
Newsletter Kierfchen: https://kierfchen.lu/aktuelles/
Kurioses - Episode 9: Uebstzorten:
