Mat enger eegener Photovoltaikanlag drot Dir net nëmmen zur Energietransitioun an dem Klimaschutz bäi, mee kënnt och Är Stroumkäschten optiméieren. Déi Ufank 2025 agefouert nei Stroumtarifstruktur ënnerstëtzt d'Entwécklung vun engem modernen a séchere Stroumnetz. Duerch d'Autoconsommmatioun vun Ärem produzéierte Stroum kënnt Dir Är Netzkäschten stabil a niddereg halen.
Eng Photovoltaikanlag produzéiert Stroum, deen Dir direkt verbrauchen oder an d'Netz aspeise kënnt. Den eegene Stroum fir elektresch Geräter, eng Wärmepompel oder d'Luede vun engem Elektroauto ze notzen, ka finanziell sënnvoll sinn – besonnesch wann de Stroumpräis vun Ärem Energiefournisseur méi héich ass wéi de Präis fir d'Aspeisung vun Ärem Solarstroum.
E Batteriespäicher kann d'Autoconsommatioun nach weider erhéijen, andeems en iwwerschëssege Solarstroum späichert an nuets zur Verfügung stellt. Well sou Späicheren awer mat Käschten an engem gewësse Ressourcenopwand verbonne sinn, ass eng gutt duerchduecht Dimensiounéierung wichteg.
Fir eng éischt Bewäertung fir d'Machbarkeet an d'Rentabilitéit vun Ärem Projet ze kréien, kënnt Dir den nationale Solarkadaster ënnert energie.geoportail.lu benotzen. Dësen Outil identifizéiert déi Plaze mat der stäerkster Sonnestralung a bitt eng Funktioun fir d'Autoconsommatioun, mat där Dir Äre Verbrauch schätzen an esou déi optimal Investitioun bestëmme kënnt.
Ënner beihilfen.klima-agence.lu kënnt Dir séier an einfach d'Héicht vun de staatlechen, kommunalen a vun den Energiefournisseuren ugebuede Bäihëllefe simuléieren.
Maacht och gären e Rendez-vous mat engem Beroder vu Klima-Agence aus, fir eng gratis an onofhängeg Grondberodung ze kréien. Dëse Rendez-vous kann doheem, per Telefon oder per Videokonferenz stattfannen a kann iwwert de Formulaire op klima-agence.lu ugefrot ginn. Dir kënnt eis och iwwer déi gratis Nummer 8002 11 90 kontaktéieren.
Net jiddereen huet d'Méiglechkeet eng eege Photovoltaikanlag ze installéieren. Eng Léisung ass d'Deele vu Solarstroum: Doduerch kann de produzéierte Stroum effizient genotzt an d'Rentabilitéit vun der Anlag erhéicht ginn.
Méi Informatioune fannt Dir op www.klima-agence.lu/de/energiegemeinschaft oder an enger individueller Berodung.
Duerch d'Autoconsommatioun vun Ärem Solarstroum kënnt Dir Geräter mat héijer Leeschtung bis zu engem gewësse Grad selwer versuergen: D'Leeschtung, déi aus dem Netz geholl gëtt, kann esou däitlech reduzéiert ginn, an Netzkäschte kënne reduzéiert ginn. Dat mécht awer nëmme Sënn, wann den Aspeisetarif net méi héich ass wéi de Stroumpräis.
Och d'Deele vu Photovoltaikstroum ass eng effektiv Léisung, fir d'Energiekäschten ze senken. Andeems Dir eng Grupp forméiert, déi de Stroum deelt, kënnt Dir an der Reegel Netzkäschte vermeiden an déi kollektiv Autoconsommatioun optiméieren.
| Wéi kënnt Dir soss Är Netzkäschte reduzéieren? |
|
Nieft enger cleverer Notzung vun Ärem Solarstroum lount et sech, Stroumtariffer ze vergläichen. D'Plattform calculix.lu bitt eng onofhängeg Méiglechkeet, Energiefournisseuren ze vergläichen. Mat e puer Informatiounen zu Ärem Verbrauch an Ärer Postleitzuel kritt Dir eng Iwwersiicht zu deene beschten Offeren a kënnt gezielt deen Tarif auswielen, dee bei Iech passt. De Wiessel zu engem aneren Energiefournisseur ass iwwer dës Plattform ganz einfach méiglech.
