De 27 Joer ale Lëtzebuerger wäert d'Faarwe vun der belscher Ekipp an der Endurance Weltmeeschterschaft an am franséische Superbike Championnat 2023 droen.

Um Circuit Bugatti zu Le Mans ass an dräi Wochen déi éischt Course vun der Endurance-Weltmeeschterschaft an esou waren de leschte Weekend och vill Wierksfuerer aus der WM sur place, wéi do déi éischt Manche vu der franséischer Meeschterschaft gefuer gouf. No senge staarke Leeschtungen an de leschten zwee Joer huet d’Equipe RAC 41 Chromeburner mat der Hëllef vun Honda France dëst Joer och de Lëtzebuerger an dem Superbike-Championnat ageschriwwen.

Am Qualifying de Samschdeg hat de 27-Järegen nach Ofstëmmungsprobleemer a war ënnert knapps 50 Piloten mat senger 13. Plaz, zwouanenghallef Sekonnen hannert dem franséische BMW-Wierksfuerer Jeremy Guarnoni net ganz zefridden. Um Sonndeg de Moie waren du schwiereg Bedingungen a mat Reepneuen op fiichter Streck konnt de séiere Lëtzebuerger seng ganz Klass weisen. Eng hallef Minutt hannert dem Honda-Wierksfuerer Mickaels Di Meglio konnt hie seng Honda Fireblade als Fënneften iwwert d’Zillinn bugséieren.

Sonndes Mëttes sinn di meescht dunn op Slicks gestart, ma schonns an der éischter Ronn gouf de Chris Leesch zwee Mol ofgedrängt an ass vu senger 13. Startplaz bis hannert déi 20. Plaz zeréckgefall. De Rescht vu de 15 Ronne goung et just nach no vir, ma um Enn huet him als 12. eng weider Ronn gefeelt, fir nach emol an d'Top10 ze fueren. No zwou Victoirë féiert de Mickaels Di Meglio de Championnat un an de Chris Leesch ass Siwenten.

Ee Méindeg koum dunn d’Nouvelle, datt de Lëtzebuerger des Saison och d’Faarwe vu de Black Knights wäert droen. Zu der belscher Ekipp vu Zelos gehéieren eng ganz Partie staark Motosfuerer queesch duerch all Kategorien. Den nächste Weekend kënnt et da zu enger weiderer Première vu dem Motossportler: Hei bei RTL wäert de Chris Leesch de Sonndeg Owend de Livestream vum argentinesche MotoGP kommentéieren.

Dem Chris Leesch säi Courseprogramm 2023

25/26.03.       FSBK             Le Mans

15/16.04.       24h Moto       Le Mans

29/30.04.       FSBK             Nogaro

27/28.05.       FSBK             Ledenon

17/18.06        24h Spa         Spa Francorchamps (B)

01/02.07        FSBK             Magny-Cours

15/16.07.       FSBK             Pau Amos

26/27.8.          FSBK             Carole

16/17.09        Bol d’Or         Paul Ricard

30/01.10.       FSBK             Paul Ricard