Zu Borrego Springs an den USA wollt de Ralph Diseviscourt 24-Stonne-Weltmeeschter ginn, ma en Accident huet dëst verhënnert.

Et hat gutt ugefaangen an de Lëtzebuerger Ultra-Cyclist konnt sech un d'Spëtzt vun der Course setzen. No 7 Stonne Course hat hien allerdéngs een Accident mat engem sougenannten "Liegerad". Dobäi huet hie sech d'Schlësselbee gebrach. No senger Arrivée e Mëttwoch hei zu Lëtzebuerg huet hie Prezisioune ginn, wéi et zum Accident komm ass.

Extrait Ralph Diseviscourt

"Et war op engem deem Deel vun der Streck, wou et liicht mat engem Faux-Plat eropgoung. Dat heescht, d'Vitess war net därmoossen héich. Villäicht 30 bis 35 Stonnekilometer. Op eemol kënnt aus dem Näischt ee Liegerad, esou een Dräirad, wat do op der Streck war. Ech hunn et net gesinn a kann haut nach net soen, ob eng Luucht drop war oder net. Ech weess just nach, datt ech am leschte Moment probéiert hunn, auszewäichen. Et ass mir esou just net gegléckt an ech hunn hien ze pake kritt an hunn de Kopplabunz geschloen. Ech hu relativ schnell du gemierkt, datt ech an der rietser Schëller ee komescht Gefill hat. Dunn ass och schnell d'Decisioun geholl ginn, fir d'Course opzeginn.

Ech géif soen, datt d'Enttäuschung elo méi grouss ass, wéi déi physesch Péng, déi een huet. Et ass eng Course, wou ee sech ganz laang muss drop virbereeden, wou och den Opwand immens grouss ass, fir iwwerhaapt dohinner ze kommen. Ëmsou méi deet et wéi, wann een d'Course op dës Manéier muss ofbriechen. Zemools, wann een nach op esou enger gudder Positioun läit. Zu deem Ament, wou den Accident geschitt ass, louch ech liicht a Féierung."

D'Enttäuschung war do. De Ralph Diseviscourt behält awer och Positives vun der 24-Stonne-Weltmeeschterschaft zeréck. "Datt ech trotz dem spéiden Zäitpunkt vun der Saison nach eng ganz gutt Form hat. Ech hu relativ wéineg agebousst zu der Form, déi ech am Summer hat. Am Virfeld hat ech meng Bedenken, wéi meng Form wäert sinn."

Awer och d'Streck a Kalifornien huet et dem Ralph Diseviscourt ugedoen. "Eng ganz flott Streck! Et ass gutt ze fueren, et ass "roulant". Eng Streck, déi mir wierklech och entgéintkënnt, duerch zwee, dräi Faux-Platen, déi d'Saach wierklech schwéier maachen."

Nodeems et am Ufank geheescht huet, datt de Ralph Diseviscourt net misst operéiert ginn, huet Diagnos, déi elo hei zu Lëtzebuerg gemaach gouf, awer erginn, datt eng OP um Schlësselbeen néideg ass.

Et war iwwregens déi éischte Kéier, datt de Ralph Diseviscourt bei enger Ultra-Course opginn huet.