Um Hesper Holleschbierg sinn e Samschdeg déi nei Lëtzebuerger Championen am Cyclocross gesicht ginn.

Resumé Cyclocross-Championnat / Reportage Lynn Kayser
De Resumé vun de weidere Kategorien
Hei konnte sech ënnert anerem de Rick Meylender an d'Liv Wenzel den Titel sécheren.

Dammen

D'Marie Schreiber huet sech fir d'zweete Kéier den Titel bei der Elite am Cyclocross-Championnat geséchert. Vum Depart ewech huet déi 20 Joer al Lëtzebuergerin, déi international zur Weltspëtzt gehéiert, d'Course dominéiert an hat op der Arrivée ronn dräi Minutten Avance op d'Christine Majerus. Drëtt ass d'Isabelle Klein ginn.

No der Sëlwermedail op der EM bei den U23-Dammen an elo dem Championstitel bei der Elite steet fir d'Marie Schreiber Ufank Februar mat der WM awer nach den Héichpunkt vun der Saison um Programm. Hei huet si sech e kloert Zil gesat. Eng Medail wëllt si vun Tabor an Tschechien mat zeréck an de Grand-Duché bréngen.

D'Reaktioun vum Marie Schreiber um Mikro vum Lynn Kayser
D'Christine Majerus am RTL-Interview

Bei den Espoirinnen huet d'Liv Wenzel mat enger staarker Leeschtung hiren Titel verdeedegt. D'Anouk Schmitz an d'Layla Barthels sinn 2. an 3. ginn.

D'Reaktioun vum Liv Wenzel

Bei de Juniorinne war d'Gwen Nothum am stäerksten. Zweet ass d'Lisi Schmitz ginn.

Bei de Masters war mam Suzie Godart eng Damm um Depart an huet sech domadder och den Titel geséchert.

PDF: Resultater vum Cyclocross-Championnat

Hären

Loïc Bettendorff heescht den neie Champion bei der Elite. Hien huet sech e spannenden Duell mam Raphaël Kockelmann geliwwert. De Loïc Bettendorff war laang hannert dem Raphaël Kockelmann. No an no konnt hien de Réckstand awer verkierzen, opschléissen a sech an de leschten Tier un d'Spëtzt setzen. Mat enger Avance vu 26 Sekonnen huet sech den Atertdauler säin éischten Titel bei der Elite geséchert. Nieft dem Raphaël Kockelmann huet de Ken Conter de Podium komplettéiert.

D'Reaktioun vum Loïc Bettendorff um Mikro vum Lynn Kayser

Bei den Espoire bleift de Mats Wenzel am rout-wäiss-bloen Trikot. Hien huet sech ganz knapp virum Mathieu Kockelmann behaapt. Drëtten ass de Mil Morang ginn.

De Mats Wenzel am RTL-Interview

De Mathieu Kockelmann hat sech um Depart direkt un d'Spëtzt gesat. De Mats Wenzel ass awer Tour fir Tour méi no erukomm. Béid Coureure sinn dunn zesummen an de leschten Tour gaangen. Um Enn war de Wenzel eng Grëtz besser an ass Champion.

Debutanten

D'Course vun den Debutanten huet den Optakt gemaach. De Ben Koenig huet sech hei souverän d'Victoire geséchert. Hie louch vun Ufank un eleng un der Spëtzt. Och hannendru waren d'Plazen 2 an 3 fréi decidéiert. Um Podium stoungen nach den Dawson Fehlen Pereira an de Loïc Gouveia.

Bei de Meedercher huet sech d'Kylie Bintz den Titel geséchert. Si huet sech an der Hallschent vun der Course vun der Zweetplacéierter June Nothum ofgesat. Déi drëtt Plaz war fir d‘Elena Lopes.

Junioren

Bei de Junioren ass d'Decisioun tëscht dem Favorit Rick Meylender an dem Jonah Flammang-Lies eréischt am leschten Tour gefall. Béid Coureuren hate sech an der Hallschent vun der Course vun hire Konkurrenten ofgesat. De Rick Meylender huet sech um Enn mat enger klenger Avance den Titel geséchert. De Jonah Flammang-Lies huet sech no engem Feeler misse mat der zweeter Plaz zefridde ginn. De Yannis Lang huet sech Bronze geséchert.

Fir de Ryck Meylender ass et deen zweeten Titel am Cyclocross. Hie war och scho Champion bei den Debutanten.

De Rick Meylender um Mikro vum Lynn Kayser

Masters

Bei de Masters gouf et eng ganz souverän Start-Zil-Victoire fir den Tommy Arnoldy. Hien huet schonn déi ganz Saison dominéiert an um Samschdeg mam Championstitel seng 11. Victoire gefeiert. D'Plazen 2 an 3 ware fir de Marc Rolf Indergand an den Tom Flammang.

Weider Biller a Reaktioune vum Championnat ginn et e Sonndeg den Owend am Journal op der Tëlee.