E Samschdeg war den Dirk Carlson mat Karlsruhe SC zu Nürnberg an der 2. Bundesliga am Asaz an de Lars Gerson huet a Schweden ee Succès gefeiert.

Sonndeg

Och um Sonndeg ware Lëtzebuerger op internationalem Plang gefuerdert. Esou och de Jeff Saibene als Trainer an der 3. däitscher Liga. Hei war de Lëtzebuerger mat Ingolstadt bei de 2. Ekipp vu Bayern München op Besuch an huet do 1:2 de Kierzere gezunn.

De Florian Bohnert war mat der 2. Ekipp vu Mainz 05 zu Ulm an der Regionalliga Südwest zu Gaascht. De Lëtzebuerger Nationalspiller konnt mat sengem Veräin eng 1:0-Victoire mat Heem huelen an huet dobäi 90 Minutten duerchgespillt.

Am Roazhon Park zu Rennes hat Stade Rennais den OSC Lille op Besuch. De Veräin vum Lëtzebuerger Investisseur Gérard Lopez ass zwar duerch den Ikoné a Féierung gaangen, krut awer gläich drop den 1:1-Ausgläich geschoss. D'Partie ass um Enn och mat dësem Resultat ausgaangen.

Beim 5:0-Succès vun Dynamo Kiew souz de Gerson Rodrigues 90 Minutten iwwer op der Bänk.

Samschdeg

An der Bundesliga ass den SC Paderborn mam Laurent Jans op der Bänk an der däitscher Haaptstad bei der Hertha ugetrueden. 10 Minutte war d'Partie am Gaangen, wéi den Dilrosun fir seng Faarwen de Score op gemaach huet. 1:0 fir d'Lokalekipp war och d'Resultat an der Paus.

Déi Al Damm huet nom Téi op en Neits getraff an d'Féierung op 2:0 ausgebaut. Paderborn koum am weidere Verlaf lues awer sécher an de Match a konnt duerch den Zolinski de Réckstand verkierzen. D'Ekipp vum Laurent Jans koum awer net méi erun an huet eng 1:2-Defaite missen astiechen.

Fir de Kont vum 8. Spilldag an der 2. däitscher Bundesliga krut Nürnberg doheem Besuch vum Karlsruher SC. Beim KSC war den Dirk Carlson an der Ufankseelef an huet beim 1:1-Remis géint den "Club" duerchgespillt. Karlsruhe war an der 24. Minutt duerch een Eelefter vum Geis a Réckstand geroden, dat well de Lëtzebuerger Nationalspiller ee géigneresche Spiller am Strofraum un d'Fale bruecht huet. 5 Minutte virun der Paus konnt de KSC awer duerch de Stiefler ausgläichen.

Den 1. FC Kaiserslautern ass um 9. Spilldag vun der 3. Liga virum eegene Public net iwwer een 1:1 géint den 1. FC Magdeburg erauskomm. De Club vum Lëtzebuerger Geschäftsmann Flavio Becca bleift mat dësem Gläichspill am leschten Drëttel vun der Tabell.

Royal Excelsior Virton, deen anere Veräin vum Flavio Becca, krut an der 2. Belscher Liga Besuch vu Beershot. Mat dobäi war vun Ufank un den Anthony Moris am Gol an de Kevin Malget sou wéi den Dave Turpel souzen op der Bänk. Bei der 3:0-Victoire ass den Dave Turpel an der 70. Spillminutt agewiesselt ginn - de Kevin Malget koum net an den Asaz.

A Schweden ass de Lars Gerson mat dem IFK Norrköping géint Örebro ugetrueden. De Lëtzebuerger Nationalspiller huet vun Ufank u matgespillt a konnt domat zu der 3:0-Victoire säin Deel bäidroen.

De Vahid Selimovic ass iwwerdeems an der 1. zypriotescher Liga fir Apollon Limassol opgelaf. De Lëtzebuerger Nationalspiller war vun Ufank un um Terrain an hat der 0:1-Néierlag näischt entgéint ze setzen.

Freideg

An der Ligue 2 a Frankräich huet Orléans mam Vincent Thill sech géint de Leader Le Havre ee Punkt geséchert. No 90 Minutten ass de Match mat engem 2:2-Remis ausgaangen. De Lëtzebuerger Nationalspiller stoung 90 Minutten um Terrain. No 8 Spilldeeg huet Orléans 4 Mol gläichgespillt a 4 Mol de Kierzere gezunn.

Am russesche Championnat huet Ufa mam Olivier Thill e Freideg den Owend vun engem Selbstgol profitéiert, fir mat 1:0 géint Spartak Moskau ze gewannen. De Rasskazov hat an der 13. Minutt de Ball an den eegene Filet gesat. De fréiere Spiller vum Progrès, Olivier Thill, stoung an der Startformatioun, hat an der 26. Minutt déi giel Kaart gesinn a gouf an der 78. Minutt ausgewiesselt.

Net esou erfreelech war den Owend fir den Tim Hall an de Marvin Martins am ukrainesche Championnat. Déi zwee Lëtzebuerger Nationalspiller hu mat hirem Veräin Karpaty Lwiw auswäerts 0:2 géint Dnipro-1 verluer. Den Hall an de Martins stoungen déi 90 Minutten iwwer um Terrain.