Donieft stoung och de Vahid Selimovic de ganze Match um Terrain a wënnt mat Limassol mat 3:2.

Sonndeg

An der Schwäiz stoung de Spëtzematch tëscht de Young Boys Bern an dem FC Basel um Programm. Mam Christopher Martins, deen de ganze Match um Terrain stoung, huet Bern mat 2:0 gewonnen a bleift domadder op der 1. Plaz.

An der éischter Divisioun an Zypern wënnt de Vahid Selimovic mat Apollon Limassol mat 3:2 géint Achnas nodeems se no 23 Minutten mat 3:1 a Féierung louchen an déi 3 Goler an 13 Minutte gesicht hunn. De Lëtzebuerger stoung de ganze Match um Terrain. Limassol läit no 16 Matcher op der 3. Plaz mat engem Réckstand vun 4 Punkten op den éischten.

Samschdeg

De Laurent Jans war bei der 2:0 Victoire vum SC Paderborn géint den SC Freiburg de ganze Match am Asaz. Duerch déi Victoire klëmmt Paderborn an der Tabell fir op Mannst eng Nuecht op déi 17. Plaz an der Tabell.

De Leandro Barreiro Martins ass am Match géint Mönchengladbach an der 67. Minutt beim Stand vun 1:1 agewiesselt ginn. Zum Schluss muss sech Mainz awer nach mat 1:3 geschloe ginn.

Fir de Jeff Saibene ass et mam FC Ingolstadt zu Duisburg ee Punkt ginn. Duerch den 1:1 bleift domat déi 2. Plaz an der Tabell bestoen.

61 Minutte stoung de Maurice Deville bei der 1:0 Victoire vu Waldhof Mannheim géint den SV Meppen um Terrain. Duerch eng Giel-Rout Kaart fir de Ferati an der 58. Minutt war en taktesche Wiessel néideg.

Mam Anthony Moris, Kevin Malget an Aurélien Joachim ware bei der 1:0 Victoire vun Excelsior Virton géint de VA Beerschot direkt dräi Lëtzebuerger am Asaz. Duerch déi Victoire bleift Virton weiderhin Tabelleleader an der Proximus League.

Freideg

De Vincent Thill stoung déi lescht Matcher net am Kader vum US Orléans, well säin Trainer net zefridde mat him ass. Och dëse Freideg war de Lëtzebuerger Nationalspiller net am Kader. Ma ouni hien konnte si sech mat 2:0 duerchsetzen. Orléans bleift weider um Schluss vun der Tabell, konnt de Réckstand awer verkierzen.
An der Zweethéchster hollännescher Spillklass war den Enes Mahmutovic mat Maastricht am Asaz bei de Graafschap. De Lëtzebuerger stoung vun Ufank un um Terrain, ma et sollt  net de beschten Dag fir seng Ekipp ginn. Mat 2:3 hu si sech misse geschloe ginn a sou bleiwe si am Mëttelfeld vun der Tabell stiechen.