Mat 3 Victoiren aus 3 Matcher huet sech Lube Civitanova eng optimal Ausgangspositioun fir d'Qualifikatioun fir d'Véierelsfinalle verschaaft.

En Dënschdeg an e Mëttwoch stinn d’Retourmatcher an der Haaptronn vun der Volleyball-Champions-League um Programm an do heescht et sech nees nei konzentréieren. Virun allem no den zwou rezenten Defaiten am italienesche Championnat. Nach virun enger gudder Woch hat Lube Civitanova d'Finall vun der Coppa italia géint den Dauerrival Perugia kloer mat 3:1 gewonnen. 3 Deeg drop gouf et am Championnat eng knapp 2:3-Defaite géint deselwechte Géigner an och de leschte Samschdeg huet sech Lube misse géint Valentia geschloe ginn. Fir de Lëtzebuerger koumen déi Resultater grad zum richtegen Ament.

"Mir mussen déi wichteg Matcher gewannen," sou de Kamil Rychlicki.

No den 3 Victoiren am Dezember huet sech de Kamil Rychlicki mat sengem Veräin Lube Civitanova eng optimal Ausgangspositioun verschaf. Den Owend dass den Optakt vun der Réckronn an der Volleyball Championsleague, wou sech d'Italiener wëllen den Ticket fir Véierelsfinalle sécheren.

Preview Champions League / Reportage Marc Burelbach

Nodeems de Kamil Rychlicki 2019 Clubbweltmeeschter gouf a no 2020 elo seng zweete Coppa Italia mat Lube Civitanova feiere konnt, feelen dem Lëtzebuerger just nach zwee grouss Titelen am internationale Volleyball.

"Jo, d'Champions League gëtt ëmmer als eppes Grousses an Aussergewéinleches ugesinn. Ech mengen, ech kéint awer eréischt beurteelen, wann ech deen Titel géif gewannen, wéi ee mech méi zefridde stellt. Ech muss awer éierlech soen, datt fir mech de Scudetto, also de Championstitel an Italien, eppes Aussergewéinleches ass. Déi italienesch Liga ass dofir bekannt, déi beschte Spiller an och Ekippen ze hunn."

En Dënschdeg den Owend spillt Lube Civitanova géint Tours aus Frankräich. Am Allersmatch konnt sech de Favorit aus Italien mat 3-0 duerchsetzen. Et sinn awer dacks déi vermeintlecht méi liicht Géigner, déi ee net dierf op déi liicht Schëller huelen.

"Deen Ament, wou s de um Terrain bass an du hues bei engem 2:0 Avantage de Gedanken, datt s de gewënns, dann verléiers de dacks nach."

Den Fokus läit awer ganz kloer um Match vun e Mëttwoch géint den Dauerrival vu Perugia.

"Et ass kloer, datt dat all Kéiers een Derby ass. Dobäi kënnt, nach datt si a mir u sech ëm all Titel spillen, dat ass u sech den Highlight."

De leschte Mëttwoch hat Perugia Revanche geholl fir d’Defaite an der Finall vun der Coupe an Lube bei sech mat 3-2 geklappt. Fir de Kamil Rychlicki ass et wichteg déi richteg Spannung opzebauen.

"An der Coupefinalle war eng gewëssen Tensioun um Terrain, déi dann den Ënnerscheed mécht. Mol kucken, wéi et elo an der Champions League ausgesäit."

D'Zil ass kloer: Sech als Tabellenéischte fir d'Véierelsfinallen ze qualifizéieren. De Match

Champions League live op RTL.lu

En Dënschdeg steet also nees Champions League um Programm. Déi gëtt des Kéier zu Perugia gespillt. Den tierkesche Géigner Izmir huet, wéi schonn am Dezember, wéinst dem Coronavirus misse Forfait erklären. Am éischte Match geet Civitanova géint Tours als klore Favorit an de Match. An awer dierf een d'Fransousen net ënnerschätzen.

E Mëttwoch kënnt et dann nees zum Highlight tëschent Lube Civitanova an der Ekipp vu Perugia. D'Stäerkt vum Kamil Rychlicki senger Ekipp läit an der Homogenitéit vum Kader.

An dësen ze stoppen ass fir all Ekipp op der Welt eng Erausfuerderung.

D'Matcher vun der Volleyball-Champions-League ginn och dës Kéier nees am kommentéierte Livestream op RTL.lu iwwerdroen.