Domat geet Käerjeng fir dës Saison eng éischte Kéier als Verléierer vum Terrain. Bei den Häre kann den HBK eng kloer Victoire géint de Standard feieren.

E Samschdeg stoungen déi éischt zwee Nodrosmatcher bei den Hären um Programm. Iwwerdeems war et bei den Dammen den Optakt vum 6. Spilldag an der AXA League. Am Spëtzematch konnte sech déi Diddelenger Damme mat 21:17 géint Käerjeng duerchsetzen. Beetebuerg spillt iwwerdeems 16:16-Gläich géint Esch.

Hären-Handball

HBC Schëffleng - Chev Dikrech 25:25

No 12. Minutte stoung et wuel 3:3-Gläich, an der Suite ass Dikrech awer ënnert dem Impuls vum Sascha Marzadori besser un d'Rulle komm, sou dass et no 26 Minutten 11:6 fir Dikrech stoung. Kuerz virun der Paus ass de Schëfflenger awer nach een 3:0-Laf gelongen, sou dass de Réckstand an der Paus bei 2 Goler louch. (9:11)

Nom Säitewiessel gouf de Match immens intensiv gefouert. Schëffleng ass duerch 3 séier Goler zeréck an de Match komm a louch tëschenzäitlech mat 18:15 a Féierung. Dikrech huet sech awer net hänke gelooss. Marzadori a Schmit hu bannent 2 Minutten 3 Goler markéiert, sou dass et 10 Minutte viru Schluss aus der Siicht vun Dikrech mat 19:20 an d'Schlussphas gaangen ass. An enger immens serréierter Schlussphas an e Gol 6 Sekonne viru Schluss kann Dikrech nach 25:25-Gläich zu Schëffleng spillen.

HB Käerjeng - HC Standard 34:18

Den Opsteiger aus der Stad huet eng ganz gutt Ufanksphas gewisen. Den Alexandru Cioban huet de Standard no 9 Minutte mat 3:2 a Féierung bruecht. Dono ass de Favorit vu Käerjeng awer ëmmer besser an de Match komm an esou stoung et no 20. Minutten 8:5 fir d'Lokalekipp. Och an der Suite hu Cosanti a Co. den Tempo weiderhin héich gehalen, sou dass d'Käerjenger Léiwe mat engem Virsprong vu 6 Goler (13:7) an déi 2 Hallschent gaange sinn.

Änlecht Bild an deenen zweeten 30 Minutten. Käerjeng huet de Ball lafe gelooss an esou konnten den Eric Schroeder a Co. de Virsprong possessiv an d'Luucht schrauwen. 15 Minutte viru Schluss hat d'Lokalekipp 10 Goler Avantage (23:13). Den HBK huet näischt méi ubrenne gelooss a gewënnt um Enn géint den HC Standard mat 34:18.

Dammen-Handball

Red Boys Déifferdeng - Chev Dikrech 24:25

No knappe 6 Minutte louchen d'Damme vun der Red Boys mat 3:1 a Féierung. Dono hhunn awer d'Dikrecher Dammen d'Zepter an d'Hand geholl an esou hat Dikrech an der Paus sech een 3 Goler Virsprong eraus gespillt. (12:9). Nom Säitewiessel huet sech lues awer sécher eng immens serréiert Partie entwéckelt. Ënnert dem Impuls vum Tania Soberano louchen d'Red Boys tëschenzäitlech 23:21 vir. Um Enn ka sech de Chev awer a leschter Minutt nach d'Victoire sécheren.

HB Dideleng - HB Käerjeng 21:17

Béid Ekippen hunn eng ganz serréiert Ufankspha gewisen. Ouni Spectateuren hunn d'Damme sech op béide Säiten näischt geschenkt, sou dass et no 5 Minutten 2:2 stoung. D'Käerjenger Damme konnte virun allem der Golkipperin Merci soen. No ronn 24 Minutte louch den HBK awer mat 6:12 am Réckstand. Dat well Diddeleng ënnert dem Impuls vun de Schwëstere Kim a Joy Wirtz ee 5:0-Laf gelongen ass. Mat engem Virsprong vu 6 Goler ass Diddeleng (13:7) an d'Kabinne gaangen. 

Och an der 2. Hallschent war Diddeleng déi vill méi aktiv an dynamesch Ekipp. D'Käerjenger Dammen haten um Samschdeg den Owend Schwieregkeeten, de Rhythmus ze fannen. Beim bis dohin ongeschloenen Tabelleleader sollt et einfach net sinn. No 45. Minutte louche si mat 10:18 am Réckstand. D'Gäscht haten nach eng Kéier ugesat, fir an de Match zeréckzekommen. Méi wéi een 3:0-Laf sollt awer net dobäi erauskommen. Domadder verléiert Käerjeng fir eng éischte Kéier an dëser Saison an dat mat 17:21.

HB Beetebuerg - Handball Esch 16:16

HC Standard - HB Museldall 11:38