Bierchem klappt Miersch mat 45:24. Fir Miersch war et den zweete Match bannen 2 Deeg, dat nodeems si um Samschdeg en Nodrosmatch am Championnat haten.

E Sonndeg den Owend stoung am Lëtzebuerger Handball d'Suite vun de 1/4-Finalle vun der Coupe um Programm. Bei den Häre klappt Bierchem Miersch a bei den Dammen ass et eng Victoire fir Käerjeng géint Museldall.

Hären-Handball

HC Berchem - HB Mersch 45:24 (20:12)

Nodeems Miersch sech e Samschdeg an der Nodrospartie 32:22 géint Schëffleng behaapte konnt a sech domat als 6. Ekipp fir de Playoff qualifizéiere konnt, stoung um Sonndeg de Coupematch géint Bierchem um Programm. Fir Miersch war d'Aufgab am zweete Match banne 24 Stonnen awer einfach ze grouss. Nieft de kierperleche Strapaze war Bierchem och spilleresch um Sonndeg e Strapp ze gutt an esou kenne si sech no der 20:12-Féierung an der Hallschent um Enn souverän mat 45:24 fir d'Halleffinall an der Coupe qualifizéieren. 

Red Boys Déifferdeng - HB Diddeleng 30:27 (20:12)

An den éischte Minutte war et an der Spëtzepartie vun der Coupe een ausgeglachene Match, sou dass et no 10 Minutten och 5:5-Remis stoung. Duerno ass d'Lokalformatioun besser an de Match komm, dëst ënner anerem och, well de Moldrup am Gol vun de Red Boys ëmmer erëm paréiere konnt. Virun allem an de leschte 5 Minutte virun der Paus konnt Déifferdeng de Grondsteen fir ee Weiderkomme leeën, dëst well si an där Zäit duerch ee 5:0 d'Avance op 8 Goler gesat haten. Soumat stoung et an der Paus 20:12 aus Sicht vun de Red Boys. 

An der 2. Hallschent ass Diddeleng lues a lues besser an de Match komm a si konnten de Réckstand ëmmer weider verkierzen. Den Aldin Zekan konnt fir déi Déifferdenger insgesamt 8 Mol markéieren, wärend de Josip Ilic op Säite vun Diddeleng och mat 8 Goler déi meeschte Goler markéiere konnt. Um Enn sollt nach eng Kéier e bësse Spannung opkommen, ma d'Avance vun Déifferdeng aus der éischter Hallschent ass um Enn duergaangen a sou qualifizéiere sech d'Red Boys duerch eng 30:27-Victoire fir d'Halleffinallen.

HB Käerjeng - HC Standard 32:23 (13:12)

Dammen-Handball

HB Miersch - HC Atert Réiden 14:26

Hunn Mierscher Dammen an der Paus nach mat 3 Goler a Réckstand geleeën, sou huet Réiden an der 2. Hallschent e Gang erop geschrauft a wannen um Enn verdéngt mat 26:14.

HB Käerjeng - HB Museldall 22:14

Den HB Käerjeng ka sech iwwerleeden a verdéngt mat 22:14 géint den HB Museldall behaapten a steet domat an der Halleffinall vun der Coupe.

HB Esch - HB Diddeleng 13:27 (3:15)

Déi erwaarte kloer Victoire gouf et fir Diddeleng. De Favorit huet sech mat enger klorer 27:13-Victoire zu Esch verdéngt den Ticker fir d'Halleffinalle geséchert.

CHEV Dikrech - Red Boys Déifferdeng 27:26 (14:11)

Ganz knapp war dogéint e Samschden den Owend d'Partie tëscht dem Chev an de Red Boys. Hei war et bis zum Schluss spannend, ier sech de Favorit mat engem Punkt Virsprong den Ticket fir déi nächst ronn konnt sécheren.

De Chev klappt d'Red Boys
An enger ganz spannender Partie ka sech um Enn d'Lokalekipp mat 1 Punkt Virsprong duerchsetzen.