Am Best-of-Three-Modus huet Diddeleng déi 2. Finall géint den Houwald mat 5:3 gewonnen an huet domadder alles kloer gemaach.

Diddeleng feiert de Championstitel / Reportage Fränky Hippert

9 mol Champion hannertenee ze ginn, ass schonn exzeptionell. Et geet awer elo net ëm d'Meeschtertitele vum FC Bayern München, deem dat Konschtstéck e Samschdeg jo och gelongen ass, mä ëm den Dëschtennis Club vun Diddeleng. Gilles Michely a Co. hu géint den Houwald de Sak schonn no zwou vu méiglechen 3 Finallen zougemaach.

Déi éischt Final hat Diddeleng virun enger Woch mat 5-2 gewonn. Am Modus "best of three", wollt den Houwald sech awer net esou séier geschloe ginn. Um Enn gouf et awer och an der zweeter Partie e 5-3 Succès fir d'Ekipp aus der Forge du Sud.

Gilles Michely: "Mir si frou, datt mer dat gepackt hunn. Mir waren e bësse besser an dëse Finallen. Si waren e bësse besser an der Coupefinal. Fir eis war et eng Motivatioun, datt si no der Coupe vun enger neier Ära geschwat hunn. Dat war respektlos vis-à-vis vun eis a vun deenen aneren Ekippen."

An dobäi ass den Nationalspiller ugeschloen an d'Finallen eragaangen: "Ech hunn elo zanter Wochen eng Blessure um rietsen Aarm a kann net richteg Virhand méi spillen."

An der Coupe-Finall konnt sech den Houwald nach duerchsetzen. An de Championnatsfinallen huet een awer missen d'Iwwerleeënheet vun Diddeleng unerkennen, de President vun der Ekipp vum Holleschbierg Frank Schreiber: "Diddeleng hat sech gutt agestallt op eis. Et scheitert u klengen Detailer."

De Spiller vum Houwald Marc Dielissen ass sech bewosst, datt et op Klengegkeeten ukoum: "Si hunn déi entscheedend Matcher gewonnen, an dofir hu se de Match gewonnen."

Den Dëschtennisclub vun Diddeleng huet den eenzegaartegen Exploit fäerdegbruecht, 9 mol hannertenee Champion ze ginn. An der Forge du Sud däerf een awer net vergiessen, fir an der Ekipp fir d'Relève ze suergen, wann een déi Success Story wëll weider schreiwen.