Déi Déifferdenger hu sech mat 33:27 géint Käerjeng behaapt. Bierchem war Esch knapp mat 23:22 iwwerleeën.

De Weekend decidéiert sech an der Coque wie sech dës Saison kann d'Coupe am Härenhandball sécheren. Um Samschdeg hu sech d'Red Boys a Bierchem den Ticket fir d'Finall geséchert. Déifferdeng huet sech an den Halleffinalle kloer géint Käerjeng behaapt a Bierchem huet an engem ganz spannende Match géint Esch gewonnen. D'Finall vun der Coupe gëtt e Sonndeg um 16 Auer gespillt. Dir kënnt d'Partie am Livestream op RTL.lu kucken.

An der éischter Halleffinall gouf et eng kloer a verdéngte Victoire fir d'Red Boys. Déi Déifferdenger hu sech duerch eng 33:27-Victoire géint Käerjeng den éischten Ticket fir d'Finall geséchert. Déi Déifferdenger waren e Samschdeg déi däitlech besser Ekipp. Vun Ufank un hu si de Match u sech gerappt a konnte sech esou séier eng Avance erausspillen. No 15 Minutte louch ee mat 10:7 am Avantage. Bis d'Paus ass de Virsprong op 6 Goler gewuess, sou datt et beim 18:12 an d'Kabinne gaangen ass. Och an den zweeten 30 Minutte konnten déi Käerjenger de Match net dréinen. Si sinn ze nervös opgetrueden, hu Feeler gemaach a waren net präzis genuch an der Attack, fir eng Chance géint d'Red Boys kënnen ze hunn. Um Enn hunn d'Red Boys de Virsprong iwwert d'Zäit bruecht a gewanne mat 33:27 géint Käerjeng.

An der zweeter Halleffinall war et tëscht Esch a Bierchem däitlech méi spannend. Béid Ekippen hu sech näischt geschenkt, ma no 60 Minutte war Bierchem een Tick besser an huet mat 23:22 géint Esch gewonnen. Vun Ufank u war et e ganze enke Match tëscht béide Formatiounen. Bierchem war méi dacks am Avantage, ma déi Escher sinn ëmmer nees erukomm an hunn d'Ekipp vum Scheubel net dovun zéie gelooss. Beim Score vun 10:9 fir Bierchem ass et an d'Paus gaangen. An den zweeten 30 Minutte war et dat nämmlecht Bild, just datt e bësse méi Goler gefall sinn. Bierchem louch déi ganzen Zäit vir an Esch ass engem Réckstand hannendru gelaf. D'Ekipp vum Gulbicki ass bis maximal op ee Punkt erukomm. Zum Schluss huet Bierchem ganz knapp gewonnen. Domadder huet Bierchem weiderhin d'Chance op den Titel an der Coupe. Fir Esch gëtt et näischt mam Doublé an dëser Saison.