E Freideg fänkt zu Amstetten an Éisträich de Silver-League-Tournoi un. D´Lëtzebuerger Häre kréien et do mat Kroatien, Ungarn an Éisträich ze dinn.

D'Chancen op ee gutt Resultat si géint dës Géigner méiglech, well déi 3 Natiounen am europäesche Ranking just liicht besser klasséiert si wéi d'Lëtzebuerger Ekipp. Et ass allerdéngs schonns eng Zäitchen hier, dass d'Hären eng Kompetitioun haten. De leschte Match hu si viru 16 Méint beim Tournoi an der Coque gespillt. Duerno war wéinst Corona Paus. Fir ee vun de Piliere vun der Ekipp, de Chris Zuidberg, war dat eng laang Zäit:

"Fir mech perséinlech ass et ëmmer eng Freed, mech mat der Nationalekipp op der internationaler Bün ze weisen. Fir d'Ekipp am Allgemengen ass d'Virfreed do, well d'Championnat zu Lëtzebuerg eng länger Paus wéinst Corona hat. Do ass een ëmmer frou, fir all Minutt, déi een um Terrain ka kréien."

De Chris Zuidberg ass ee vun de Routiniere vun der Ekipp. Déi Ekipp ass ee gesonde Mix aus jonk an al:

"Bei der enger oder anerer Persoun ass villäicht nach bësse méi Nervositéit mat dra gemëscht wéi bei deene Leit, déi schonns méi laang dobäi sinn. Dat ass ee ganz normale Prozess. D'Ekipp zitt awer un engem Strang an déi selwecht Richtung."

Éisträich ass déi Ekipp, déi de Chris Zuidberg a seng Matspiller am beschte kennen.

"Géint Éisträich hu mir schonns méi dacks gespillt. Mä och do änneren ëmmer puer Spiller vu Joer zu Joer. Si hunn och een neien Trainer kritt. Do ass dann och d'Fro, wéi si oplafen."

Déi zwee anere Géigner sinn éischter Onbekannter fir d'FLVB-Selektioun.

"Ungarn a Kroatien hunn ech nach net vill gesinn. Do kucke mir da mam Trainer, wat mir virbereede fir de Match. Mir kommen net heihinner, fir Vakanz ze maachen. Mir wëllen an all Match alles ginn."

Ofgesi vum Kamil Rychlicki, deen no enger laanger Saison mat sengem italienesche Veräin eng Paus aleet, kënnen d'Lëtzebuerger an Éisträich a Beschtbesetzung untrieden. Mam Kamil Rychlicki feelt den aktuell beschte Lëtzebuerger Spiller. Fir de Chris Zuidberg muss een trotzdeem kucken, datt een dat beschtméiglechst Resultat realiséiert.

De Chris Zuidberg

"Dass ee Spiller wéi de Kamil eis kéint hëllefen, ass guer kee Geheimnis. Mat der Experienz an dem Niveau, wou hie spillt, kéint hien eis ganz vill hëllefen. Mir wäerten och een anert Spill opzéie mat oder ouni hien. Ob dat elo vu Virdeel ass, datt hien dobäi ass oder net, dat woen ech net ze soen."