Domadder ass et fir Lëtzebuerg déi véiert Néierlag am véierte Match vun der Silverleague.

Fir d'Lëtzebuerger Härennationalekipp am Volleyball gouf et bis ewell dräi Néierlagen an der Silverleague. Géint Kroatien, Ungarn an Éisträich haten d'Lëtzebuerger, déi als Underdog an den Tournoi gestart sinn, keng Chance.

En Donneschdeg den Owend stoung fir d'FLVB-Hären am Gymnase vun der Coque deen éischte Retourmatch um Programm. De Géigner war Kroatien. An och heiheem konnten eis beschte Volleyballspiller net fir eng Iwwerraschung suergen. An dräi Sätz an deels ganz kloer, 25:19, 25:16 a 25:17, huet sech Kroatien duerchgesat. Esou bleift Lëtzebuerg ouni Victoire aus véier Matcher op der leschter Plaz am Grupp B vun der Silverleague. Hei Leit Ungarn mat 4 Victoiren an 11 Punkte viru Kroatien mat 3 Victoiren an 9 Punkten. Drëtten ass Éisträich mat enger Victoire a 5 Punkten.

Den Tim Laevaert a seng Matspiller hu géint Kroatien ënnert hirem Niveau gespillt, esou den Tim Laevaert um RTL-Mikro:

Ganz vill eege Feeler. Et kann ee ganz kloer soen, datt et ee Schratt ze schnell gaangen ass fir eis. Esou hate mir eis dat net virgestallt. Mir wollte schonns un déi Leeschtung, déi mir an Éisträich géint si gewisen hunn, uknäppen. Mir haten eis virgeholl nees ee Saz ze huelen. Dat war awer net dran. Mir mussen elo no vir kucken an de Match géint Ungarn preparéieren.

Op RTL.lu kënnt Dir d'Matcher vun de Lëtzebuerger Hären an Damme bis e Sonndeg all am Livestream kucken.

De Programm am Iwwerbléck

Freideg, 28. Mee vun 17.30 Auer un
Lëtzebuerg géint
Slowenien
(Dammen)

Samschdeg, 29. Mee vu 15 Auer un
Lëtzebuerg géint Israel
(Dammen) Samschdeg, 29. Mee vun 20 Auer un
Lëtzebuerg géint Ungarn
(Hären)

Sonndeg, 30. Mee vu 17.30 Auer un
Lëtzebuerg géint Éisträich (Dammen)

Sonndeg, 30. Mee vun 20 Auer un
Lëtzebuerg géint Éisträich (Hären)