Den Thomas Grün wiesselt vun Tréier op Esch, den Olivier Vujakovic kënnt aus Éisträich zeréck op Walfer.

Am Basket ass et d'Nouvelle, datt den Thomas Grün déi nächst Saison net méi bei de Gladiators vun Tréier spillt. Dat huet de Veräin offiziell matgedeelt. De Lëtzebuerger Nationalspiller hat zanter 2016 bei der Ekipp aus der zweeter Bundesliga gespillt. Elo wiesselt hie bei de Coupegewënner op Esch. Fir de Concernéierte selwer ass de Wiessel ee logesche Choix.

Extrait Thomas Grün

Ech wäert zu Esch liewen a wunnen. Vun do hir wëll ech meng Weeër esou kuerz wéi méiglech hunn, fir esou vill wéi méiglech Zäit mat menger Famill a menger zukünfteger Fra ze verbréngen. Dofir bitt sech Esch perfekt un. Et ass awer och ee Veräin, bei deem ech mech gesinn. Si hunn iwwer Jore schonns déi selwecht Amerikaner, dee selwechte Grupp vu Leit, wat mir gutt gefält. Ech mengen, datt mir eppes erreeche kënnen an dofir ass mäi Choix op Esch gefall.

Basket: Grün op Esch / Reportage Rich Simon

Den Thomas Grün huet ënnert anerem zu Nanzeg an déi leschte Joren zu Tréier gespillt. Bei de Gladiators, der Ekipp aus der zweeter däitscher Bundesliga, war hie bis elo och Kapitän. Elo zitt hie mat 27 Joer ee Schlussstréch ënnert seng Profikarriär. De Choix, fir an Zukunft fir de Basket Esch ze spillen, ass awer net nëmmen ee sportlechen.

De Fait, fir emol zeréck op Lëtzebuerg ze kommen, ass reng privat. Ofgesi vum Sportlechen. Ech wëll meng Zukunft opbauen. Et gëtt ee laangt Liewen nom Basket. Ech hunn elo iwwer déi leschte Jore super Erfarunge gesammelt. Fir mech ass elo Zäit, fir no menger Zukunft ze kucken. Dofir kommen ech elo zeréck op Lëtzebuerg, fir hei schaffen ze goen. An de Basket wäert eng bësse méi niewesächlech Roll a mengem Liewe spillen.

Mam Thomas Grün zielt Esch ouni Zweiwel zu den Top Favoritten, fir d'nächst Joer de Championstitel ze gewannen. Dat ass deenen Escher, ofgesinn vun der ofgebrachener Corona-Saison, bis elo nach net gelongen. Den Thomas Grün wëll de Ball awer trotzdeem bësse flaach halen.

Et wäerte vill interessant Ekippen do sinn. Ech hoffen, datt et eng spannend Saison gëtt. Natierlech hu mir Ambitiounen, natierlech hunn ech Ambitiounen. D'Zil ass et, fir uewe matzespillen. Et ass awer nach fréi, fir vu Favoritten ze schwätzen. Komm mir waarde mol, bis den Training ugefaangen huet.

Den Olivier Vujakovic wiesselt fir déi nächst Saison nees zeréck bei säin ale Veräin, d'Residence Walfer. Hei hat den Nationalspiller scho bis 2018 gespillt, éier hien an Éisträich gewiesselt ass, dëst fir de Basket a seng Studien ënnert een Hutt ze kréien.