Nom 0:3 géint Slowenien an Estland ass et elo déi drëtt Néierlag am drëtte Match an dëser Kompetitioun. Dat nees mat 0:3.

Am Volleyball huet ons Dammennationalekipp e Mëttwoch Owend an der Coque hiren 3. Match an der European Silver League gespillt. No den 0-3 Defaitë géint Slowenien an Estland, goung et géint Schweden, dat sech an dräi Sätz zwee Mol op 13 an op 19 ganz kloer géint Slowenien behaapt huet. Deemno konnt een dat Schlëmmst fir ons Ekipp fäerten. Et gouf eng 0:3 Defaite (22:25,15:25,10:25), mä d'Lëtzebuerger Dammen hu sech awer gutt gewiert.

Am Duerchschnëtt waren d'Schweedinne 7 Zentimeter méi grouss wéi eis Spillerinnen. E groussen Avantage fir d'Gäscht. An doriwwer eraus duerch déi schweedesch Spiller-Qualitéiten hat ee geduecht, d'Lëtzebuerger Damme kéimen ënnert d'Rieder. Dat war awer net esou. Si hu wuel vu Saz zu Saz resultatméisseg ofgebaut, mä opginn hu si sech ni. Si hu richteg gekämpft, kee Ball verluer an dat huet sech virun allem am éischte Saz erausgeschielt.

Bei 4:3 si si eng éischte Kéier a Féierung gaangen, konnte sech allerdéngs net ofsetzen. Och d'Gäscht hunn dëst bis 16 net fäerdeg bruecht. Beim Score vu 16:16 hunn d'Schweedinnen en temps mort geholl. Duerno goung et op hirer Säit besser. Si kruten en 3-Punkte-Viirsprong, dee si bis un de Schluss vun dësem Saz behalen hunn.

D'Maryse Welch:
"Si hunn eis den éischte Saz ënnerschätzt a bëssen op déi liicht Schëller geholl. Si hunn zwar mam 6 de base ugefaangen, mee si sinn net richteg an de Match komm. Si waren du bëssen ënner Drock an hunn dunn eng Schëpp drop geluecht an deenen zwee anere Sätz. Si hunn net op deem Niveau vum éischte Saz weider gespillt. De Problem ass, datt si mega héich sinn. Si sinn ee gutt Stéck iwwer eisem Block an dann drécke si déi Feinten séier erof. Do hu mir keng Chance, déi ze kréien. Mir hunn Taktik net geännert, wat ech awer elo net schlëmm fannen. An de Defense stounge mir mol guer net esou schlecht."

Ganz schlecht fir d'Lëtzebuerger Damme goung den 2. Saz un. 0:6, esouguer 1:9 stoung et. Et konnt een dat Schlëmmst fäerten. Ma och hei hunn d'Spillerinne gekämpft a lues awer sécher e puer Punkte gemaach. Um Enn waren et der 15. 24 Minutten huet dëse Saz gedauert, eng manner wéi deen éischten.

Déi drëtt a lescht Manche war du fir d'Schweedinnen nëmmen nach eng Formsaach. De Grondsteen hu si direkt am Ufank geluecht, 8:1 ware si vir. An dunn hu sech op Lëtzebuerger Säit duerch Middegkeet och nach einfach Feeler ageschlach, esou dass ons Dammen an dësem Saz nëmmen 10 Punkte vun de Profie vu Schweden zougestane kruten. Wéi erwaart ee verdéngte Succès fir d'Schweedinne géint eng gutt Lëtzebuerger Ekipp, déi iwwer dëse Wee Erfarunge sammele muss.

E Sonndeg treffe d'Dammen dann um 17 Auer op Portugal.