En Donneschdeg trëfft sech d'Elitt zu München fir déi 2. Oplag vun de European Championships. Am Ganze gi 4.700 Athleten an 176 Competitiounen un de Start.

Hei een Iwwerbléck vun de Lëtzebuerger a Lëtzebuergerinnen, déi un de European Championships (11. August bis 21. August) zu München deelhuelen a wéini si un de Start ginn.

Konschtturnen

Am Konschtturnen ass Lëtzebuerg mat fënnef Sportler vertrueden. Bei de Frae geet d'CélesteMordenti un den Depart. Bei den Häre sinn et de QuentinBrandenburger, de RonanFoley, de MathisKayser an den JoyPalermo, déi déi Rout-Wäiss-Blo Faarwe vertriede wäerten. D'CélesteMordenti wäert direkt en Donneschdeg um éischten Dag schonn am Asaz sinn, wougéint de QuentinBrandenburger a Co. eréischt zum Schluss vun der zweeter Competitiounswoch lassleeën dierfen.

Liichtathletik

Ganzer véier Liichtathleten hunn et op d'Event zu München gepackt. D'VictoriaRausch, déi iwwer 100 Meter Hecken un den Depart geet, ass réischt den 20. August (Virleef um 20.43 Auer) am Asaz, wougéint de BobBertemes schonn e Méinden an der Qualifikatioun (10 Auer) fir d'Bommstoussen un de Start goe wäert. Och d'Sprinterin Patrizia van der Weken iwwer 100 Meter (Virleef um 11.05 Auer) an de CharelGrethen iwwer 1500 Meter (Virleef 20.15 Auer) musse schonn e Méinden an der Virleef untrieden.

Vëlo

Am Vëlossport fiert d'ChristineMajerus den 21. August (11.30 Auer) d'Stroossecourse vun de Fraen zu Fürstenfeldbruck. Bei de Männer gëtt dës Course e Sonndeg (10.15 Auer) gefuer. Do fuere souwuel de CédricPries an de ColinHeiderscheid mat.

Triathlon

Am Triathlon ginn de LucasCambresy a de BobHaller un den Depart. Si sinn e Samschdeg (16 Auer) gefuerdert. D'JeanneLehair, déi deemnächst als Lëtzebuergerin un de Start goe wäert, trëtt e Freideg (17.15 Auer) an der Course vun de Fraen un.

Dëschtennis

Am Dëschtennis sinn d'Lëtzebuerger am stäerkste representéiert. Nieft dem Ni Xia Lian an dem Sarah De Nutte gi bei de Fraen och nach d'Ariel Barbosa an d'Tessy Gonderinger un den Depart. Bei den Häre sinn et den Eric Glod an de Luka Mladenovic.

Am Dubbel-Mixed ginn zwee Duoen un de Start. Souwuel fir den Duo Glod/De Nutte wéi och fir den Duo Mladenovic/Ni geet den Turnéier schonn e Samschdeg (10 Auer) lass.

Am Dubbel bei de Männer ass d'Koppel Mladenovic/Glod iwwerdeems och e Samschdeg am Asaz, souwéi déi zwee Fraenduoen De Nutte/Ni a Barbosa/Gonderinger Dammen um 11.30 Auer an Hären um 12.05 Auer).

Alle sechs si se och am Eenzel am Asaz. Fir de Mladenovic, de Glod, d'Gonderinger an d'Barbosa start hei den Turnéier schonn e Sonndeg an der Gruppephas, wougéint d'Ni Xia Lian an d'Sarah de Nutte eréischt nom 16. an der Haaptronn am Asaz sinn.