Bei den Damme konnt sech e Sonndeg zum Ofschloss vum 1. Spilldag den AB Contern mat 67:53 géint d'Etzella behaapten

Hären

E Sonndeg huet sech am leschte Match vum éischte Spilldag d'Etzella mat 107:82 (30:23, 39:17, 19:21, 19:21) géint Conter behaapt. Déi Ettelbrécker hu mat 30 Punkten am éischte Véierel staark ugefaangen an hu mat 39 Punkten am zweete Véierel nach méi staark nogeluecht. Am weidere Spillverlaf konnt de Gaascht AB Contern dann de Réckstand zwar liicht verkierzen, trotzdeem huet sech d'Etzella dës Victoire net méi huele gelooss. Um Enn steet eng verdéngte Victoire an domat e Succès zum Optakt an déi nei Saison.

Am éischte Match vun der Saison hat sech e Samschdeg d'Residence Walfer mat 94:82 (34:17, 15:23, 25:27, 20:15) géint d'US Hiefenech duerchgesat. Virun 100 Spectateuren am Centre sportif Prince Henri waren d'Haushäre ganz gutt an d'Partie gestart an hu sech am éischte Véierel eng Avance vu 17 Punkten erspillt. Hiefenech huet sech an den zwee Véierelen duerno e bëssen erugekämpft, mee d'Residence huet an de leschten 10 Minutten alles kloer gemaach. Op Walfer Säit hu mam Grant Dressler (27 Punkten), Oliver Vujakovic (23 Punkten) an Trevion Crews (21 Punkten) dräi Spiller iwwer 20 Punkte markéiert, wärend den Justin Strings fir Hiefenech mat 22 Punkte beschte Scorer war.

D'Arantia Fiels iwwerrascht de Coupe-Gewënner 2022 a gewënnt mat 80:73 (22:19, 25:19, 14:19, 19:16) géint de Basket Esch. D'Ekipp aus der Fiels war besser an de Match komm an huet Esch direkt am Ufank den Zant gezunn. Zur Paus waren et néng Punkten Avance fir d'Heemekipp, déi Esch am drëtte Véierel awer bal ausgläiche konnt. An de leschten zéng Minutten huet d'Arantia dann awer nees opgedréint an de Match fir sech entscheet. Op béide Säiten hunn d'Amerikaner dem Match hire Stempel opgedréckt. Den Jamison Vashaun Overton huet fir d'Fiels 33 Punkte markéiert, fir de Clancy Mac Rugg op Escher Säit stoungen 29 Punkten am Carnet.

De Match tëscht de Musel Pikes an Diddeleng war wärend dräi Véierele spannend, mee am leschte Véierel ass der Ekipp vun der Musel d'Loft ausgaangen an den T71 konnt sech um Enn dach kloer mat 89:74 (18:17, 18:19, 22:23, 30:16) duerchsetzen. De Vize-Champion huet sech an de Match mussen eraknéien a konnt dem Moses Greenwood Merci soen, deen hannen 18 Rebounds a vir 27 Punkte gemaach huet.

Steesel huet mam Gréngewald kuerze Prozess gemaach. Bei der 94:67-Heemvictoire (24:14, 17:21, 31:16, 22:16) war de Champion 2022 dem Opsteiger just am zweete Véierel ënnerleeën, soss huet d'Amicale hir Stäerkt ausgespillt a kloer fir sech entscheet. Um Scorerboard haten den Alexander Reese (Steesel) an den Trevond Barnes (Gréngewald) mat 25 Punkten déi selwecht Punktzuel.

Wéi bei den Dammen huet d'Sparta Bartreng der AS Zolwer keng Chance gelooss an d'Gäscht mat engem 98:69 (29:20, 25:23, 22:16, 22:10) heemgeschéckt. An der éischter Hallschent konnt Zolwer de Match nach phaseweis matgoen, mee am zweeten Deel vum Match war d'Loft eraus. Op Bartrenger Säit hu mam Cameron James (23 Punkten), Elijah Oluwaeyi (21 Punkten) a Max Logelin (20 Punkten) dräi Spiller 20 Punkten oder méi markéiert.

De Resumé vum Match Sparta géint Zolwer
D'Ekipp vu Bartreng konnt sech hei mat 89:69 behaapten.

Um Sonndeg komplettéieren d'Etzella Ettelbréck an den AB Contern den éischte Spilldag vun der neier Saison.

Dammen

E Sonndeg huet bei den Dammen zum Ofschloss vum 1. Spilldag d'Etzella mat 53:67 (14:13, 10:15, 20:22, 9:17) géint Conter de Kierzere gezunn. D'Ekipp vun Ettelbréck war zwar besser an de Match gestart a konnt den éischte Véierel notze fir a Féierung ze goen, duerno huet den AB Contern awer ëmmer besser an d'Partie erafonnt. An den dräi nächste Véierel hate si ëmmer d'Nues e Stéck vir, wat um Enn zu enger Victoire mat 14 Punkten Ënnerscheed gefouert huet.

E Samschdeg goufe bei den Damme schonn déi aner véier Matcher gespillt.

Am Spëtzematch vum éischte Spilldag sinn de Coupe-Gewënner Walfer an de Champion Diddeleng openee getraff, mam besseren Ausgank fir Diddeleng. Den T71 setzt sech um Enn mat 87:74 (25:15, 21:18, 20:20, 21:21) zu Walfer duerch. D'Ekipp aus der Forge du Sud huet déi éischt Hallschent kloer dominéiert an déi erausgespillten Avance net méi ofginn. Walfer huet de Match an der zweeter Hallschent ausgeglach gestallte kënnen, konnt de Retard awer net méi ophuelen, obwuel si mam Kierra La Nae (31 Punkten) déi bescht Scorerin um Terrain haten. Fir Diddeleng huet d'Nadia Mossong 26 Punkte markéiert.

De Resumé vum Match Walfer géint den T71
D'Ekipp vun Diddeleng konnt hei mat 87:74 wannen.

D'Musel Pikes gewannen den éischte Match vun der Saison mat 85:70 (23:18, 17:18, 27:15, 18:19) géint Wolz. D'Ekipp aus dem Norden huet am éischten an am drëtte Véierel ze vill Punkten hänke gelooss, konnt déi aner Véierelen awer ëmmer mat engem Punkt Avance fir sech decidéieren. Fir d'Musel Pikes ass et déi éischt Saison ouni d'Cathy Schmit, d'Laure Diederich an d'Bridget Yoerger.

De Gréngewald séchert sech déi éischt Punkten an der neier Saison a gewënnt mat 77:63 (24:13, 18:21, 19:16, 16:13) zu Steesel. D'Amicale war guer net gutt an de Match gestart an huet dësen Ecart net méi kënne gutt maachen. Fir Steesel ass et en enttäuschende Start an déi nei Saison, well si sech an der Off-Season gutt verstäerkt hunn, fir nees ëm de Championstitel matspillen ze kënnen.

D'Sparta Bartreng huet den Opsteiger AS Zolwer mat 93:28 iwwerrannt. D'Gäscht vun Zolwer hunn an der éischter Hallschent just aacht Punkte markéiert. Bartreng hat de Match schonn zur Hallschent gewonnen a konnt et duerno méi roueg ugoen.