Um Sonndeg ware bei den Damme wéi bei den Hären d'Partien Zolwer géint d'Etzella an Esch géint Bartreng. Steesel, Diddeleng an d'Fiels bleiwen ongeschloen.

Hären

Um Sonndeg stoungen nach zwou Partien um Programm. De Basket Esch léisst der Sparta Bartreng keng Chance a gewënnt mat 96:74 (27:22, 27:18, 22:27, 20:7). Déi Escher haten déi éischt Hallschent dominéiert a sech e komfortabelen Ecart erausgespillt. Obwuel d'Sparta am drëtte Véierel nach eng Kéier Opdriff krut, ass an de leschten 10 Minutten näischt méi gelaf an Esch konnt den Ecart nach eng Kéier vergréisseren.

Um Scheierhaff zu Zolwer huet Ettelbréck mat 84:62 (30:17, 28:15, 15:14, 11:16) géint Zolwer gewonnen. D'Etzella huet direkt am Ufank gewisen, wien déi besser Ekipp ass an hat sech bis zur Paus eng kloer Avance vun 30 Punkten erausgespillt. An den nächsten zwee Véierelen ass Zolwer besser an de Match komm a konnt de Score bis zum Schluss nach e bësse verbesseren.

Virun 250 Spectateuren waren d'Tribüne mol nees eng Kéier richteg gefëllt, am Derby tëscht Hiefenech an der Fiels, wou et anstänneg zur Saach gaangen ass. Et war eng serréiert, ëmkämpfte Partie. An der Paus stoung et 35:29 zu Gonschte vun der Heemekipp. Am Ufank vum leschte Véierel huet d’Fiels sech kuerz ofgesat 53:63, mä Hiefenech koum nach emol op 61:63 erun. Déi lescht 5 Minutten hunn awer d’Decisioun zu Gonschte vun de Gäscht aus der Fiels bruecht. Aus 61:63 hu si en 66:74 Schlussresultat gemaach.

RTL

© Guy Seyler

De Gréngwald hat d'Musel Pikes op Besuch. An all Véierel hat Hueschtert d'Nues vir a konnt esou virun 267 Zuschauer am Centre Sportif "Am Sand" eng kloer Victoire feieren, dat mat 92:74.

Virun enger schwiereger Aufgab stoung den AB Conter géint d'Amicale Steesel, an dat krute se och ferm ze spieren am éischte Véierel, dee mat 27:12 ganz däitlech un déi Steeseler gaangen ass. Virun der Paus konnt Conter de Réckstand liicht reduzéieren. Och den 3. Véierel goung u Conter, ma den Ecart war schonn ze grouss. Déi Steeseler hunn de Match geréiert a gewannen um Enn mat 10 Punkte Virsprong géint Conter (81:91).

Den T71 Diddeleng war dann den eenzege Veräin, deen et op iwwer 100 Punkte gepackt huet um Samschdeg. De Géigner vu Walfer koum op 92 Punkten, déi awer net sollten duergoen. De leschte Véierel huet den Diddelenger gehéiert. Deen hu se mat 32:22 gewonnen, fir um Enn mat 101:92 géint d'Residence d'Iwwerhand ze behalen.

Dammen

Bei den Damme waren et um Sonndeg déi selwecht Ekippen am Asaz wéi bei den Hären. D'Sparta Bartreng gewënnt zimmlech kloer mat 79:57 (18:14, 23:15, 22:10, 16:18) beim Basket Esch. Am éischte Véierel war d'Partie nach serréiert, mee am zweeten an drëtte Véierel huet d'Sparta sech e kloren Ecart erausgespillt an um Enn verdéngt gewonnen. Si stinn elo mat 4:0 Punkten an der besserer Punktdifferenz op Plaz 1.

Am zweete Match vum Sonndeg huet d'Etzella béid Punkte vun Zolwer mat heem geholl. Ettelbréck gewënnt mat 75:57 (19:10, 20:18, 14:12, 22:17) um Scheierhaff duerch. Bescht Scorerin vum Match war d'Bartrenger Spillerin Isis Naomi Lane mat 27 Punkten.

Bei den Dammen huet de Coupe-Gewënner Walfer mat 96:77 géint Wolz gewonnen. D'Résidence hat vun Ufank un d'Kontroll am Match an huet d'Victoire ni aus der Hand ginn. Fir Walfer ass et déi éischt Victoire an dëser Saison.

Déi zweet Victoire am zweete Match gouf et da fir Conter. Virun den eegene Spectateuren huet ee sech géint d'Amicale mat 65:56 duerchgesat. An der Paus stoung et 32:26 fir d'Lokalekipp.

An am drëtte Match vum Owend huet de Gréngewald d'Musel Pikes kloer mat 98:73 geklappt.