An de 1/16-Finallen huet sech den T71 Diddeleng am Spëtzematch an der Overtime duerchgesat. De Racing huet sech iwwerraschend géint Zolwer behaapt.

Am éischten Tour vun der Basket Coupe koum et ënnert anerem e Mëttwoch zum Duell tëscht den zwee Finaliste vum Championnat vun der leschter Saison. Diddeleng huet géint Steesel gespillt a sech no Verlängerung mat 94:89 (22:12, 14:23, 25:21,19:24,14:9) géint d'Amicale Steesel duerchgesat.

No enger ausgeglachener Ufanksphas huet sech Diddeleng am zweeten Deel vum 1. Véierel lues a lues ofgesat. Ënnert dem Impuls vum Jimmie Lee Taylor, deen 8 Punkte bäigesteiert huet, stoung et um Enn 22:12 fir d'Heemekipp. D'Gäscht hunn awer direkt reagéiert a Bob Melcher a Co hunn den 2. Quarter mat 23:14 fir sech entscheet. An der Paus stoung et deemno 36:35 fir den T71.

An der Suite war et nees d'Heemekipp, déi sech am 3. Véierel ofsetze konnt. D'Amicale huet de Réckstand awer um Enn verkierzt a sou ass et mat engem 61:56 fir Diddeleng an den decisive Véierel gaangen. D'Gäscht konnte séier ausgläichen, soudass et an der Schlussphas hin a hier gaangen ass. Quasi am Sekonnentakt hunn d'Féierunge gewiesselt. 10 Sekonne viru Schluss huet de Scott Morton d'Amicale mat 80:79 a Féierung geworf. Nodeems de Moses Greenwood just 1 vun 2 Fräiwërf fir den T71 erageschoss huet, goung et an déi 1. Overtime. D'Heemekipp hat méi e laangen Otem an huet do um Enn knapp mat 94:89 d'Iwwerhand behalen.

Datt déi zwee Finaliste vum Championnat iwwerhaapt konnten an der éischter Ronn vun der Coupe géintenee falen, hat domadder ze dinn, datt béid Ekippen no der Qualifikatiounsronn vum Championnat dat lescht Joer net ënnert den éischte 6 waren. An esou si béid Ekippen net automatesch an déi zweete Ronn komm, mee si koumen zesumme mat Ekippen aus der National 2 an 3 an d'Lousdëppe vum éischten Tour.

Ken Diederich: "et war laang ee schlechte Basketmatch"

Iwwer de Match gouf am Virfeld vill diskutéiert. De Match selwer huet awer gréisstendeels just vun der Spannung gelieft. E gudde Match huet den Nationaltrainer Ken Diederich allerdéngs net gesinn:

E war laang schlecht, et war laang ee schlechte Basketmatch, bis et zum Schluss enk ginn ass.

Den Ken Diederich huet awer eng Erklärung, firwat de Match net brillant war:

Wann d'Jongen de ganzen Dag schaffe ginn an et soll een dann owes "performen", dann ass dat schwéier. Do gesäit ee kloer, datt mir keng Profie sinn.

T71 Diddeleng klappt Steesel / Rep. Rich Simon

Nom Match gouf och nees iwwer Non-JICL-Spiller geschwat. Bei deene Steeseler stoungen der reegelméisseg 3 um Terrain. Diddeleng hat der 3 um Bou, awer ëmmer just zwee zesummen um Terrain stoen. Fir de Ken Diederich eng "Never ending story".

Ech denken, datt et kee wäert huet, dat Thema elo nees eng Kéier opzewerfen. Et däerf een der 3 hunn an dat ass och eist Gesetz. Ech denken och, datt dat elo Decisioun vun de meeschte Veräiner ass, wann een de Spillbou kuckt. Déi meescht Veräiner hunn 3 NON-JICL um Terrain oder am Kader. Ech soen awer och, datt wann een 3 NON-JICL huet, datt een automatesch gewënnt. Mir hunn och genuch Lëtzebuerger Spiller, déi ee Match kënnen decidéieren.

Weider Resultater

De Racing aus der Nationale 2 huet sech donieft iwwerraschend mat 87:74 (32:19, 20:16, 18:22, 17:17) géint Zolwer aus der LBBL behaapt a steet och an der nächster Ronn.

Schieren (Nationale 2) huet sech doheem misse mat 74:101 (28:31, 15:19, 19:23, 12:28) géint de Gréngewald geschloe ginn.

Am Match tëschent den East Side Pirates Berbuerg aus der Nationale 3 an de Musel Pikes gouf et eng kloer 124:63 (38:29, 35:11, 28:13, 23:10)-Victoire fir d'Gäscht.

De BC Mess aus der Nationale 2 huet sech iwwerdeems mat 93:66 (23:20, 23:12, 23:17, 24:17)  am Préizerdaul aus der Nationale 3 duerchgesat.

Mambra Mamer huet sech en Donneschdeg den Owend kloer an däitlech mat 88 op 55 géint Nitia Beetebuerg duerchgesat.

Wolz huet iwwerdeems mat 95:75 géint den Telstar Hesper gewonnen a steet domat am nächsten Tour.

Zu gudder Lescht huet Munneref d'Ekipp vu Käerjeng mat 90:38 iwwerrannt.

D'Resultater vun der Coupe am Iwwerbléck