D'Decisioun, mam Schwammen opzehalen, hätt sech dem Julie Meynen no, iwwert déi lescht 3 Joer ugedeit.

D'Julie Meynen annoncéiert d'Enn vun hirer Karriär / Rep. Rich Simon

D'Julie Meynen, eng vun de beschte Lëtzebuerger Schwëmmerinne vun allen Zäiten, huet decidéiert mam Kompetitiounssport opzehalen. An dat mat grad emol 25 Joer. Eng Decisioun, déi fir vill Leit iwwerraschend komm ass.

A ville Sportaarten ass een nämlech mat 25 Joer quasi um Héichpunkt vun der Karriär an et denkt een net onbedéngt dru fir opzehalen. Beim Julie Meynen ass dat awer anescht. Schonns zanter 3 Joer huet d'Schwëmmerin mam Gedanke gespillt, fir ee Schlussstréch ënnert d'Karriär ze zéien an dat obwuel 2024 d'Olympesch Spiller zu Paräis sinn: "Ech hunn dee Wëllen net, fir mech all Dag am Baseng zu quälen. Et ass dat wat ee brauch, fir eng Halleffinall oder eng Final ze erreechen zu Paräis. Dat ass ganz kloer. Ech sinn einfach net méi kapabel fir déi Aarbecht ze maachen"

No den Olympesche Spiller 2016 zu Rio de Janeiro, waren déi zu Tokyo 2021 déi zweet fir d'Julie Meynen. An déi si fir d'Schwëmmerin mat enger Enttäuschung op een Enn gaangen. "Et hat gutt ausgesinn, fir eng Halleffinall ze erreechen. Schlussendlech war ech wäit ewech vu Beschtzäiten. Dat ass als Sportler schwéier ze acceptéieren. Dowéinst wollt ech och Paräis maachen. Ech wollt nach eng Kéier ufänken a probéieren op Paräis ze goe well et mir schwéier gefall ass, déi Resultater vun Tokio ze verkraaften. Ech wollt ee bessert Enn fir meng Karriär."

D'Julie Meynen kann houfreg op hir Karriär sinn: D'Bronzemedail op der Junior Europameeschterschaft. Eng Halleffinall mat enger 12. Plaz op enger Weltmeeschterschaft, 2 Mol Olympesch Spiller an aktuell hält d'Julie Meynen och nach 9 Lëtzebuerger Rekorder.