Um Sonnde war d'Suite vum 8. Spilldag bei den Dammen a vum 10. Spilldag bei den Hären an der LBBL.

D'Etzella Ettelbréck setzt sech mat 87:79 beim Opsteiger Mamer duerch. Bei der Lokalekipp huet de Profispiller Nelson Larkins gefeelt, trotzdeem konnt Mamer de Match iwwer laang Strecken enk gestalten. Um Enn war de Kollektiv vun de Gäscht, bei deene 4 Spiller zweestelleg Punkte markéiere konnten, an dësem Match entscheedend. 28 Punkte goungen op de Kont vum Brandon Johnson.

Spannend war de Match tëschent Basket Esch an dem AB Conter. De Champion kann sech um Enn mat 76:70 behaapten, nodeems sech d'Gäscht kuerz viru Schluss nach emol op 3 Punkte konnten erukämpfen. Den Jordan Hicks huet mat 24 déi meeschte Punkte fir d'Lokalekipp geworf.

Am Spëtzematch setzt sech den T71 Diddeleng mat 97:84 géint de Leader Amicale Steesel duerch. D'Lokalekipp konnt sech direkt am éischte Véierel e klenge Virsprong erkämpfen an huet dësen am Laf vum Match kënnen ausbauen. Steesel krut de Géigner defensiv net an de Grëff a konnt sech esou net zeréck an de Match kämpfen. De Londell King war net ze stoppen, den Amerikaner koum um Enn op 42 Punkte fir Diddeleng an huet dobäi 18 vun 21 Schëss getraff. D'Amicale bleift trotzdeem un der Spëtzt vun der Tabell an der LBBL.

Wichteg Victoire fir den T71 géint d'Amicale
Een éischter iwwerraschenden Succès fir Diddeleng géint de Leader vu Steesel. Virun allem de Wellen huet bei der Lokalekipp gestemmt.

Beim Gréngewald huet de Ricky Easterling säin Debut op der Trainerbänk ginn. De Start huet seng Ekipp komplett verschlof, d'Lokalekipp louch schnell mat 15 Punkten am Réckstand. De Gréngewald huet sech awer staark zeréck gekämpft an de Match ass eréischt am leschte Véierel entscheet ginn. Um Enn wannen d'Gäscht aus der Fiels mat 92:81, den Dillon Stith huet mat 30 Punkten am beschte getraff.

E Match mat spektakuläre leschten Aktiounen hunn d'Zuschauer tëschent de Musel Pikes an de Kordall Steelers gesinn. Nodeems de Max Schmit vun de Gäscht de Match mat engem Dräier ausgläiche konnt, gouf de Gilles Kerschen vun der Lokalekipp a leschter Sekonn gefoult a konnt de Match op der Fräiworflinn gewannen, d'Musel Pikes setze sech mat 77:75 duerch, béid Ekippe sinn domat an der Tabell gläich no dësem Spilldag.

D'Sparta Bartreng wënnt auswäerts mat 99:90 géint d'Résidence Walfer. D'Gäscht hunn an all Véierel mindestens 24 Punkte geworf an des konstant Leeschtung iwwer 40 Minutten ass um Enn belount ginn, de Malek Green huet mat 43 Punkten iwwerzeegt.

Dammen

De Basket Esch konnt sech däitlech mat 103:73 géint Zolwer duerchsetzen. D'Tatsiana Likhtarovich konnt 30 Punkte markéieren. Fir Esch war et déi 2. Victoire des Saison, Zolwer huet nach kee Match gewonn.

Bei den Damme setzt sech d'Amicale Steesel auswäerts mat 97:71 géint d'Musel Pikes duerch. Bei dëser Victoire hu 5 Spillerinne vun de Gäscht minimum 11 Punkte markéiert, d'Alexia Allesch war mat 30 Punkten net ze stoppen.

De Champion Gréngewald Hueschtert wënnt doheem mat 100:81 géint Wolz. D'Amanda Cahill konnt mat 30 Punkten iwwerzeegen an d'Lokalekipp bleift des Saison ongeschloen an der LBBL.

Den T71 Diddeleng kann sech däitlech mat 61:34 géint den AB Conter behaapten. D'Mia Loyd konnt 22 Punkten geheien, Conter huet am drëtte Véierel nëmmen 2 Punkte markéiert.