Am Grupp E huet sech Chelsea no engem 1:1 géint Krasnodar déi éischt Plaz geséchert an zitt sou mam FC Sevilla, deen den Zweete ginn ass, an d’K.O.-Phas an. Krasnodar huet et mat der 3. Plaz an d’Europa League gepackt a Rennes schléisst d’Champions-League-Campagne mat engem Punkt op der 4. Plaz of.
Nodeems Dortmund de Match géint Zenit dréine konnt, hu si sech d’Victoire am Grupp F geholl a stinn sou mat Lazio an den Aachtelsfinallen. Club Bruges steet no engem Remis an der Europa League.
Am Grupp G ass et bei Juventus a Barcelona ëm d’Gruppevictoire gaangen, déi sech d’Bianconeri duerch eng 3:0-Victoire séchere konnt. Dynamo Kiew schléisst de Grupp mam Gerson Rordrigues no enger Victoire géint Ferencvaros op der 3. Plaz of a spillt sou an der Europa League weider.
Wéi et am Grupp H schlussendlech ausgesäit ass de Moment nach net gewosst, nodeems de Match tëscht PSG a Basaksehir op Grond vun engem Rassismus-Eclat ënnerbrach gouf. Am anere Match vum Grupp konnt sech Leipzig géint Manchester United duerchsetzen.
RB Leipzig - Manchester United 3:2
1:0 Angelino (2'), 2:0 Haidara (13'), 3:0 Kluivert (69'), 3:1 Bruno Fernandes (80'), 3:2 Pogba (82')
Leipzig huet net laang ofgewaart an ass mat der éischter richteger Chance och direkt a Féierung gaangen. De Sabitzer konnt sech op der rietser Säit duerchsetzen a mat senger Flank huet hien den Angelino fonnt, deen de Ball äiskal am Gol ënnerbrénge konnt.
Leipzig war déi kloer besser Ekipp, huet Manchester United sou gutt wéi net zum Zuch komme gelooss a konnt an der 13. Minutt eng weider kéier zouschloen. Den Angelino huet de Ball mat enger Flank op den Haidara bruecht, dee per Volley op 2:0 fir d’Lokalekipp erhéije konnt.
D’Gäscht hu weiderhin net an de Match fonnt a sou louch de Ball no enger hallwer Stonn eng drëtte Kéier am Gol vu United. Den Orban stoung dobäi awer am Abseits a sou ass et nom Asaz vum Videoarbitter beim 2:0 fir Leipzig bliwwen. D’Ekipp vu Manchester huet sech elo besser gewiert, konnt trotz méi Ballbesëtz awer net all ze geféierlech virun de géigneresche Gol kommen. Mat enger verdéngter 2:0-Féierung fir d’Haushären ass et also an d’Paus gaangen.
Manchester United war elo natierlech gefuerdert an ass deementspriechend och engagéiert aus de Vestiairë komm. Leipzig konnt awer gutt dergéinthalen an de Géigner gréisstendeels op Distanz vum eegene Gol loossen. An der 69. Minutt war et dann nees den Angelino, deen de Ball an d’Mëtt bruecht huet. Dës Kéier stoung de Kluivert op der richteger Plaz a sou huet den Hollänner mam Gol zum 3:0 de Match sou gutt wéi entscheet.
Manchester United huet awer nach net opginn a sou hu si den Tempo nach eng kéier erhéicht. An der 80. Minutt konnt de Bruno Fernandes dann duerch en Eelefmeter op 1:3 verkierzen.
Nëmmen 2 Minutte méi spéit konnt de Pogba dann eng weider Kéier verkierzen a sou stoung Leipzig wéi aus dem Näischt op eemol ënner Drock.
Ee weidere Gol géif heeschen, dass d’Haushären net an den Aachtelsfinalle stoe géifen. Bis zum Schluss hu si dann hannen awer näischt méi zougelooss a sou bleift et um Enn bei der 3:2-Victoire fir Leipzig.
PSG - Basaksehir (Ofgebrach)
No engem Rassismus-Eclat ass de Match tëscht PSG a Basaksehir ënnerbrach ginn.
Chelsea - Krasnodar 1:1
0:1 Cabella (24'), 1:1 Jorginho (28')
Rennes - FC Sevilla 1:3
0:1 Koundé (32'), 0:2 En-Nesyri (45+2'), 0:3 En-Nesyri (81'), 1:3 Rutter (86')
Zenit - Dortmund 1:2
1:0 Driussi (16'), 1:1 Piszczek (68'), 1:2 Witsel (78')
Lazio Roum - Club Bruges 2:2
1:0 Correa (12'), 1:1 Vormer (15'), 2:1 Immobile (27'), 2:2 Vanaken (76')
FC Barcelona - Juventus 0:3
0:1 Ronaldo (13'), 0:2 McKennie (20'), 0:3 Ronaldo (52')
Dynamo Kiew - Ferencvaros 1:0
1:0 Popov (60')
