Den éischte Roman vun der Mary Carey ass eng Mëschung tëscht Science Fiction a Psycho-Thriller. De 16te Juni ass si bei der CNL Liesrees dobäi.

D'Eleonor Adams, e Meedchen aus räichem Haus, ass Molerin a lieft mat hierem Jong Bradley am ländleche Vermont. Déi zwee gehéieren zu enger Sekt, déi vun dem charismateschen Samuel Summer gefouert gëtt. Mä esou richteg engagéiert ass d'Eleonor net, hat ass am léifste fir sech alleng. Besonnesch e puer vun deenen neie Memberen sinn him zerguttst onsympatesch. Iwwerdeems d'Kanner un engem Theaterstéck prouwen, gëtt dat rouegt Liewe vun der isoléierter Communautéit Celestania zolitt duerchgerëselt. Fräsche mat fënnef Been an zwee Käpp si just den Ufank, däischter Wolleken zéien sech iwwer Celestania zesummen. 
D'Mary Carey gouf zu Toronto gebuer a lieft zënter méi wéi 30 Joer zu Lëtzebuerg. Am Interview verréit d'Mamm vu véier Kanner,  wéi si d'Molerei fir sech entdeckt huet, firwat si trotzdem léiwer mat Wierder molt a wéi en Dram d'Inspiratioun fir hiere Roman war.

RTL

© RTL/Bea Kneip

"Irresistible Blending" ass bei Blackfountain Press erauskomm, et ass deen éischte Roman vun der Mary Carey.

"Irresistible Blending" vun der Mary Carey

En Donneschdeg 16te Juni ass si iwwregens bei der CNL Liesrees mat dobäi. Ënnert dem Titel "Those Worlds that Haunt us" liesen d'Mary Carey, de Percy Lallemang an d'Florence Sunnen am Mierscher Kulturhaus. Ufank ass um 19h30. Weider Detailer ginn et op der Säit vum Mierscher Literaturarchiv oder op der Säit vum Mierscher Kulturhaus

RTL

© CNL

RTL