Millioune Mënschen aus der ganzer Welt kënnen dëst Joer bei engem Silvester-Special mat dobäi sinn, dat et an där Form nach ni gouf.

Caféen an Diskoen zou, Ausgangsspären a ville Länner a Kontraktbeschränkungen: Op eng gréisser Party muss dëst Joer op Silvester verzicht ginn.

Dat heescht allerdéngs net, dass ee sech a sengen eegene 4 Wänn den 31. Dezember langweile muss. Dofir wëllen d'Organisateure vun Tomorrowland suergen.

E séchert, revolutionäert an internationaalt Konzept

Vun Tokio iwwer Lëtzebuerg bis op New York: Op 4 digitale Bünen wäerten dës Joer weltbekannte Museker ze gesi sinn a fir Stëmmung suergen. Dorënner den Armin van Buuren, Boys Noize, Da Tweekaz, Dimitri Vegas & Like Mike, Lost Frequencies, Major Lazer, Snoop Dogg aka DJ Snoopadelic oder Ran-D, Wildstylez.

Domat net genuch: Ganz nei ass de Standuert vun der Veranstaltung. NAOZ heescht déi digital Plaz, wou modern Technik mat 3D-Design a Spezialeffekter an den Asaz kommen. Zil ass et, de Partygäscht en eemolegt Erliefnes ze bidden an enger magescher Welt.

Vun 20 Auer owes bis 3 Auer moies gëtt déi gréissten digital Silvesterparty 2020 iwwerdroen. Museksfrënn brauchen dofir just e Computer, Smartphone oder Tablet.

De Virverkaf vun den Ticketen hat de 17. November ugefaangen.

Dass en Online-Festival an Zäite vu Social distancing eng gutt Alternativ ass, huet d'Tomorrowland schonn am Juli gewisen. Ronn eng Millioune Mënschen hate sech de Livestream „Tomorrowland Around the World" ugekuckt.