De "Gudde Wëllen", eng vun de bekanntsten Adresse fir alternativ Kultur a Clubbing, gëtt 10 Joer al

Mat enger Mëschung aus Musek, Concerten an anere kulturellen Aktivitéiten huet de Gudde Wëllen sech iwwert d’Jore séier als eng vun de bekanntsten Adressen an der Stad etabléiert.

Mat méi wéi 150 Evenementer, vun intime Concerten a Pubquizze bis hin zu spannende Performancen an DJ-Sette konnt de Gudde Wëllen am leschte Joer begeeschteren. Net nëmme gréisser Evenementer wéi den Usina Festival oder dee legendäre Waiters’ Hill Race stiechen aus hirem Programm eraus, mee och déi kleng, improviséiert Momenter, déi e Gefill vu Gesellegkeet schafen, sinn e wichtegen Deel vun hirem Konzept.

D’Geschicht vum Gudde Wëllen ass eng ganz divers: Bal 500 Shows a vill verschidde Museksstiler hunn an de leschten 10 Joer hei hiert Doheem fonnt – vu Rock an Hip-Hop bis hin zu Jazz a moderner Elektronik. Et hate scho vill bekannte Kënschtler d’Méiglechkeet, am Café opzetrieden, dorënner d’Fontaines D.C., Khruangbin a Busy P aka Pedro Winter, oder Mutiny on the Bounty nom Bataclan-Attentat am Joer 2015.

Trotz de Schwieregkeete vun der Pandemie 2020 huet d’Ekipp vum Gudde Wëllen et fäerdegbruecht, hiert Lokal um Liewen ze halen. Mat der Schafung vum De Gudde Weather, enger oppener Terrass mat Vue op d’Corniche, gouf en neie Raum geschaf, wou ee virun allem am Summer flott Momenter mat der Famill oder Frënn genéisse kann an dee mëttlerweil e Favorit fir d’Lëtzebuerger an d’Visiteuren aus dem Ausland ginn ass.

Fir säin 10. Gebuertsdag gëtt natierlech eppes Besonnesches gebueden: De 6. a 7. Dezember ginn d’Festivitéite mat enger Clubnuecht iwwer dräi Stäck an engem Festival mat engem diverse Line-up gefeiert. Et ass d’Geleeënheet, fir op e spannend Joerzéngt zeréckzeblécken a mat engem Patt op déi kommend Joren unzestoussen.

Méi genau Informatiounen iwwert de Gebuertsdagsweekend an Tickete fannt dir hei.