Iwwer 10 % vun de Leit an Europa leiden u Migrän. Kappwéi, Mo op der Kopp a Liichtempfindlechkeet si just e puer Symptomer, déi d’Migrän ervirruffe kann.

D’Affer sinn dacks schwéier duerch d’Migrän beanträchtegt. En normalen Aarbechtsdag gëtt et fir si net. Statistesch gesinn, leide Fraen dräimol méi dacks u Migräne wéi Männer.

Virun allem a moderne westlechen Industrielänner sinn d’Zuele vun de Migränspatienten an deene leschte Jore konstant geklommen. Fir d'Debora Cardoso sinn déi lescht Joren ëmmer méi schlëmm ginn.

D’Migrän huet déi jonk Fra an hirer Aarbecht als Aide-soignante esou beanträchtegt, dass en normaalt Schaffen net méi méiglech ass. Et brauch just een Ausléiser. Also en Ausléiser wéi e Geroch, eng Musek oder en Toun an d’Migrän fänkt un. Vun deem Moment un ass d'Debora komplett op d'Hëllef vun anere Leit ugewisen. D'Siichtfeld gëtt ageschränkt, et ass him schlecht an et ass extrem liichtempfindlech. An de gréisste Problem ass, et kann een net virausgesinn, wéini dat passéiert. Fir déi jonk Fra heescht dat, all Dag mat enger Ongewëssheet liewen, ob et e gudden Dag ass oder net.

Dacks ginn d’Affer vun hirem Ëmfeld net richteg acceptéiert. Vill Migränspatienten héieren ëmmer erëm Spréch wéi: Du simuléiers oder esou schlëmm ass dat guer net. Fir d'Patiente selwer ass dat keng einfach Situatioun. Trotz der medezinescher Entwécklung, fir d'Migrän ze verstoen, ass e richtegt Traitement dogéint de Moment net méiglech. Et kann ee just d’Symptomer behandelen. Och wann ee scho vill Fortschrëtter gemaach huet, ass d'Migrän ëmmer nach eppes, wat nach laang net verstanen ass.

Et ass awer elo scho kloer, dass d'Migrän wuel verierflech ass. War et eemol an der Famill, da besteet eng grouss Warscheinlechkeet, dass et och déi nächst Generatioune wäerte kréien.

Och wann aktuell un enger Sprëtz geschafft gëtt, déi et soll méiglech maachen, d'Migrän an hirer Ufanksphas ze ënnerbannen oder och komplett ze blockéieren, heescht dat net, dass déi iwwerall kann agesat ginn. Et wier awer e grousse Schratt seet den Dokter Bisdorff, Neurolog am Centre Hospitalier Emile Mayrich.

Frae si méi dacks Affer vu Migränen, well een dovun ausgeet, dass dat weiblecht Hormon Estrogen zu engem Deel en Afloss op d'Rezeptore fir Péng am Gehir huet. Dowéinst ginn d’Attacken am Alter ëmmer manner. Am Alter huelen och d'Symptomer an d'Migränsattacken ëmmer méi of, ganz verschwannen se awer ni. Wichteg fir déi richteg Behandlung vun de Symptomer ass eng fréizäiteg Diagnos. Fir déi ze diagnostizéieren, muss ee mol net ëmmer bäi e Spezialist goen. Et ass vill méi wichteg, dass een d'Diagnos esou frei wéi méiglech mécht. All Hausdokter kann déi maachen.

Méi Informatiounen doriwwer, wéi esou eng Diagnos funktionéiert, fënnt een um Internetsite vun der International Headache Society.