Rekordzuele bei den Nei-Umellunge vun Autoen zu Lëtzebuerg

Zejoert krute ronn 55'000 Autoe bei der SNCA eng nei gro, respektiv giel Kaart, woubäi méi kommerziell Ween ugemellt goufen ewéi privater. Bei der Elektromobilitéit weisen d'Zuelen zwar no uewen, de Konsument deet sech awer weiderhi schwéier.

1,8% vun de Ween, déi zejoert nei ugemellt goufen, fuere reng elektresch, ëmmerhi waren et der ronn duebel esouvill ewéi virzejoert.
Déi verschidden Hybrid-Offere koumen do scho besser un. Bei 5,7 % vun den Immatrikulatiounen huet et sech ëm e Gefier gehandelt, wat esou wuel mat Stroum ewéi mat Sprit fiert.

Déi fossil bedriwwen Autoe behale mat iwwer 90% kloer d'Iwwerhand, woubäi den Diesel weider un Terrain verléiert, mat elo nach knapp 42%.

Bensinner maache méi ewéi d'Hallschent vun den Nei-Umeldungen aus. Déi Chiffere si mer bei der Autosfederatioun FEDAMO gewuer ginn.

Nei Autoe goufen der 2019 iwwregens duebel esou vill ugemellt ewéi nach Mëtt den 80er Joren. Bal 2/3 vun den Autoe goufen op Societéiten immatrikuléiert.

Déi meescht Umeldunge gouf et tëscht Februar a Juli, do dierft den Autosfestival seng Roll gespillt hunn. Am mannsten Undrang gouf et bei der Société nationale de circulation automobile an de Méint September an Dezember.

Wa bei d'Autoen nach d'Busser, d'Camionnetten, d'Camionen, d'Trakteren an aner Gefierer derbäi gerechent ginn, da klëmmt den Total vun den Nei-Umeldunge souguer op 62'000. Vill vun deene Ween ginn iwwregens bannent den éischte Méint nees exportéiert.

Occasiounsgefierer goufen der zejoert 50'000 verkaaft an ugemellt. D'Importer ginn awer hei net consideréiert.
D'Ofmeldungen awer, där goufen et am Ganze bal 100'000.

Am Total sinn zu Lëtzebuerg iwwregens eppes iwwer 400'000 Gefierer ugemellt.

Bei den neien Autoe war zejoert iwwregens d'Mark Volkswagen am beléiftsten, mat 6643 Umeldungen.
Duerno komme Mercedes, BMW, Renault, Audi, Peugeot, Skoda a Volvo.

Bei de Camionen hat Mercedes d'Nues vir, bei de Bussen d'Daimler-Mark Setra.

D'Zuele komme vum Statec, beruff gëtt sech op d'Société nationale du contrôle technique.

Autoe vu wéi enge Marke goufen 2019 nei ugemellt? (Source: SNCT)

Bei de Camionnetten huet Renault ganz kloer d'Nues vir, mat 1'109 neien Immatrikulatiounen. Hannendru komme Peugeot (680), Volkswagen (602) a Fiat (591).