Am Grenzverkéier op der Bunnstreck tëscht Lëtzebuerg an Däitschland ass vun en Dënschdeg bis nächste Méindeg mat Stéierungen ze rechnen.

Dat deelen d'CFL an engem Communiqué mat. Grond dofir ass de Streik vum Eisebunner-Syndikat GDL an Däitschland. Vun en Dënschdeg den Owend u fuere keng Zich méi a Richtung Wittlich. D'Departe vun 19.10 an 20.10 wiere suppriméiert ginn, deelen d'CFL mat.

Vun e Mëttwoch un a bis e Méindeg den 29. Januar inclus fuere guer keng Zich méi iwwert déi Lëtzebuergesch-Däitsch Grenz. Bis dohi fueren dës Linnen also just bis op Waasserbëlleg. Et wäerten awer déi Zäit och manner Zich fueren, dat wéinst Personalmanktem. En Dënschdeg den 30. Januar sollt den Zuch nees normal fueren.

Weider Infoe fannt Dir op www.cfl.lu.

Keng Zich tëscht der Stad a Bartreng vun Dënschdeg den Owend op e Mëttwoch

Wéi d'CFL an engem Communiqué matdeelen, ginn et an der Nuecht vum 23. op de 24. Januar ausserdeem Maintenanceaarbechten tëscht der Stad a Bartreng.

Dowéinst wäert och vun 20.35 Auer en Dënschdeg bis 4.30 Auer e Mëttwoch keen Zuch a béid Richtungen tëscht den zwou Garë fueren. Fir d'Zich aus Richtung Arel wäert Bartreng d'Endstatioun sinn. Weider heescht et, datt och nach méi spéit wärend der Zäit, wou d'Aarbechte lafen, vereenzelt Zich kéinten ausfalen.

An der Nuecht op e Mëttwoch ginn dann awer Ersatzbusser agesat, dat vun 20.20 Auer un, wann een op der Stater Gare fortfiert, a vun 20.49 Auer un, wann ee vu Bartreng aus ënnerwee ass.