Restauranten, Caféen an net-essentiell Butteker mussen hir Dieren zoumaachen, Schoulen a Crèchë bleiwen op.

Et géif keng aner Méiglechkeet ginn, sot de President Emmanuel Macron um Mëttwoch den Owend an enger Usprooch op der Tëlee.

Den Emmanuel Macron iwwert de Confinement

Net-essentiell Butteker a Caféë mussen zoumaachen a Restauranten dierfe just nach Take-away ubidden. Et gëllen awer Ausnamen: D'Schoulen an d'Crèchë bleiwen op. Et dierf jidderee schaffe goen, et dierf ee säin Doheem och verloosse fir e Rendez-vous beim Dokter, fir dat Néidegst akafen ze goen oder fir engem Mënsch ze hëllefen. D'Altersheemer bleiwen donieft och op.

Dësen neie Confinement, dee mat 399 Stëmme géint 27 ugeholl gouf, trëtt vun en Donneschden op e Freideg a Kraaft a gëllt op d'mannst fir de ganzen November.

Emmanuel Macron: Jiddereen huet seng Roll ze spillen

Dëse Weekend sinn d'Autoritéiten nach bësse méi tolerant, well et ee Weekend ass, op deem eng Rei Leit aus der Vakanz dierften erëmkommen, sot den Emmanuel Macron.

Déi franséisch Regierung huet donieft och ugekënnegt, eng Maskeflicht fir Kanner vu 6 Joer un wëllen duerchzesetzen.Bis ewell ware Kanner vun 11 Joer u verflicht eng Mask unzedoen. Am Hibléck op déi "plëtzlech" a "brutal" zweet Infektiounswell wier des Moossnam noutwenneg, sot de franséische Premier Jean Castex.

Méi Detailer ginn et en Donneschdeg op enger Pressekonferenz vun der Regierung. Et geet drëms, d'Zuel vun den neien Infektioune vun ongeféier 40.000 op erëm 5.000 erofzekréien, esou de franséische President.