Op en Neits gouf en Date-Leak bekannt. Pandora Papers heeschen déi nei Revelatioune vum internationale Journalistenkonsortium ICIJ.

Q&A Pandora Papers - Deel 1 / Rep. Diana Hoffmann

Wéinst sengem Ausmooss vu bal 12 Milliounen Dokumenter an engem Volume vun 2,9 Terrabytes, ass vum gréissten Offshore-Leak an der Geschicht rieds. Eng 600 Journalisten aus 117 Länner hunn dorunner geschafft, fir dës Daten ze verschaffen.

Och vu Lëtzebuerg geet an den Dokumenter riets, dobäi promouvéier d'Land seng Finanzplaz gären. Billioune ginn hei a Fonge geréiert. Wat fir eng Roll spillt Lëtzebuerg da bei de Pandora Papers?

An 100.000 vun den Dokumenter taucht de Grand-Duché op. Dat hunn d'Journaliste vun der Onlinezeitung Reporter, déi zesumme mat engem internationale Konsortium vu 600 Journalisten op den Dokumenter geschafft hunn, erausfonnt. De Luc Caregari, Journalist bei Reporter erkläert d'Roll vum Land: „Et muss ee sech esou virstellen, dass a ville Strukturen, déi mer fonnt hunn, Suen aus Offshore-Strukturen op Lëtzebuerg lafen, a Lëtzebuerg esou de representative Volet no baussen ass. Mir sinn zu Lëtzebuerg, et ass alles gutt, an da lafen d'Sue vun do aus erëm an den Offshore eraus. Do muss sech Lëtzebuerg och d'Fro stellen, wëlle mer dat nach?"

E Beispill ass hei en Investmentfong, dee vun international bekannte russeschen Oligarche bedriwwe gouf, a bei deem Lëtzebuerg als Plattform gedingt huet, fir dubiéisen Offshore-Strukturen e gudden Image ze ginn. Am Ausland waren dës verdächteg Transaktiounen als Blanchiment-Risk consideréiert ginn, zu Lëtzebuerg awer net.

Ëmmer erëm réckelt Lëtzebuerg an e schlecht Liicht. Panama Papers, Luxleaks, an elo ebe Pandora Papers. Wat ass dës Kéier anescht?

Anescht ass, wou déi Daten hierkommen. Waren et bei de Panama Papers zum Beispill d’Dokumenter aus enger Etüd, sou komme se dës Kéier vun Offshore-Provider aus der ganzer Welt. 330 Politiker aus iwwer 90 Länner si mat hiren Offshore-Firmen an de Pandora Papers ze fannen. Dorënner och 35 Staatscheffen a Premierministeren.

Q&A Pandora Papers - Deel 2 / Rep. Diana Hoffmann

Wat sinn Offshore-Geschäfter?

Si hëllefe Leit mat vill Suen, d’Transaktioune vun hirem Verméigen ze verschleieren. Dofir schafe si komplex Finanzkonstruktiounen. Krimineller, Drogebaronen oder och Leit, déi Steieren hannerzéien, notzen dës dann. Just nach als Verglach: Bei de Luxleaks goung et ëm 28.000 Säiten, op deem et ëm déi sougenannte Steierrulings geet. Bei de Pandora Papers geet et ëm 12 Milliounen Dokumenter.

De Begrëff vun Offshore-Geschäfter ass fir vill Normalbierger méiglecherweis éischter negativ konnotéiert. Sinn déi Geschäfter dann illegal?

Geschäfter a Steieroase si generell net verbueden. Vill vun den Investitiounen, déi am Leak ze fanne sinn, schéngen och absolut legal. Illegal ginn esou Geldtransferter eréischt, wann zum Beispill Akommes, wat verstéiert muss ginn, a Steieroase verbucht gëtt, an dann dem zoustännege Finanzamt net gemellt gëtt. A ville Fäll ginn nämlech esou Zommen hin- an hiergeréckelt, fir ze verschleieren, wiem d'Suen gehéiert. De Chefredakter vu Reporter, de Chrisophe Bumb mengt awer, dass egal wéi eng differenzéiert Betruechtung soll gemaach ginn:

"A priori kann een awer soen, dass eppes, wat legal ass, net onbedéngt an der Rei ass oder ethesch ze vertrieden ass. Wann zum Beispill Politiker, wa räich Leit oder prominenter extrem komplex Offshore-Konstruktiounen opbaue mat Hëllef vu Provider, mat Affekoten oder mat anere Beroder, fir ze verstoppen, wou déi Suen hierkommen, an och fir ze verstoppen, dass iergendee liicht erausfënnt, wien dohannert stécht, weist dat jo schonn, dass do iergendeng Intentioun dohannert ass, déi villäicht net ganz an der Rei ass."

Duerch illegal Geschäfter ginn esou Billiounen a Billiounen a Steieroase geparkt, an entginn de Steierämter weltwäit.

Gëtt Lëtzebuerg säi schlechte Ruff als Steierparadäis iwwerhaapt nach lass?

Dat hunn mir um Méindeg de Moien och de Guy Heintz, fréieren Direkter vun der Steierverwaltung gefrot, an ob Lëtzebuerg genuch Kontrollen duerchféiert. Guy Heintz: "Ech mengen allgemeng huet een elo gesinn, dass all déi international Finanzplazen hei verwéckelt sinn. Do gesäit een och, dass awer ganz vill iwwer Amerika leeft. Net eleng iwwer den Delaware, mä och iwwer aner Staaten, wou Leit ganz diskret kënne Gesellschafte grënnen, sou dass net ëmmer Lëtzebuerg am Viséier ass, mä hei sinn et wuel och vill aner Finanzplazen."

Et wier awer net näischt geschitt déi lescht Joren, stëmmt de Guy Heintz zou. Esou géing elo zum Beispill den internationalen Informatiounsaustausch bestoen.

Ass weltwäit an deene leschte Joren dann eppes geschitt, fir géint Blanchiment virzegoen?

A ville Länner ass en Transparenzregester agefouert ginn, an deem de Proprietär vun der Firma muss uginn ginn. Besonnesch d'Panama Papers viru 5 Joer hunn dës Entwécklung weidergedriwwen. Ma net all Länner hunn nei Reegele selwecht konsequent ëmgesat. An och fir Lëtzebuerg bleift eng Kontroll schwéier, besonnesch wéinst deem grousse Volume un Investmentfongen, déi an der Kette vun den Offshore-Konstruktiounen eng bedeitend Roll spillen. Heizou de Christophe Bumb nach eng Kéier:

„Dat sinn esou enorm vill Suen, wou dat net am Verhältnis steet mat deem Personal, wat d'CSSF (Commission de Surveillance du Secteur Financier) an insgesamt och staatlech Autoritéiten zur Verfügung hunn. Dat heescht, et ass egal, wéi schwéier dat ze kontrolléieren, wat do fir Geschäfter lafen."

5,6 Billiounen Euro u Verméige ginn op der Fongeplaz Lëtzebuerg verwalt. Domat ass Lëtzebuerg no den USA déi 2. gréisst Fongeplaz op der Welt, sou de Journalist och nach. Dass alles propper ass, kéint een net soen, well all Joer géingen et e puer 100 Fäll ginn, wou verdächteg Transaktioune vun Investmentfonge gemellt ginn.

Accuséiert wiere sech géint d'Revelatiounen

De jordanesche Kinnek Abdullah wëll juristesch Schrëtt ënnerhuelen. Den Haff weist och d'Aussoen iwwer dem Kinnek seng Milliounegeschäfter mat Luxusimmobilien am Ausland zeréck. D'Fakte wären verzerrt duergestallt. D'Konklusiounen an den Artikele wäre falsch. D'Objeten am Ausland wären nämlech net geheim a mat ëffentleche Gelder wäre se net bezuelt.

Och Moskau weist d'Reprochen zeréck. De russeschen President Wladimir Putin wär net an Offshore-Geschäfter involvéiert, heescht et. An den tschechesche Premier Babiš wëll vu Steiervirdeeler näischt wëssen.