De Buergermeeschter vu Biissen Jos Schummer demissionéiert aus der CSV a mécht eng Rei Reprochen un d'Parteispëtzt.

Hie géif domat Konsequenzen aus dem Google-Vott vu virun enger knapper Woch zéien, sou de Jos Schummer am RTL-Interview.

Déi zwee CSV-Conseilleren Christian Hoscheid a Cindy Barros hate beim Vott iwwer de PAG net mat hirer Fraktioun mä mat "Nee" gestëmmt an domat hirem Buergermeeschter an de Réck gefall. Um Enn goufen et 4 Jo-Stëmmen, 5 Enthalunge vun der Fraktioun "Är Leit" an déi zwou Nee-Stëmme vun de genannten CSV-Conseilleren.

E Méindeg huet de Jos Schummer der CSV een ageschriwwene Bréif geschéckt. Am RTL-Interview huet hien der Parteispëtzt de Reproche gemaach, dass bis elo kee bei him nogefrot hätt, firwat hien déi Decisioun geholl huet. Hien huet och bedauert, dass hien um nationale Plang keng Ënnerstëtzung krut.

De Jos Schummer huet kloer gemaach, dass hie just als Member vun der CSV, awer net als Buergermeeschter demissionéiert hätt. Dëse Schrëtt hätt hie sech ganz gutt iwwerluecht.

Senger Meenung no ass de Projet Google zu Biissen duerch des Decisioun awer net blockéiert. Et dierft op alle Fall awer net zu engem Stëllstand kommen! Hie wéilt dass Google op Biissen kënnt a géif alles dru setzen, dass dat och geschitt, sou nach de Jos Schummer. Hie brauch awer elo eng nei Majoritéit, an dat kéint déi fréier Oppositioun sinn.