Wann een e Protokoll bezuelt huet, bleift dat nach 48 Méint an engem separate Fichier stoen, och wann et net méi am Fichier central steet.

En Donneschdeg de Moie kruten déi parlamentaresch Kommissioune fir bannescht Sécherheet a fir Justiz, d'Etüd iwwert déi verschidde Policefichierë virgestallt, déi de Policeminister vun der IGP, der Inspection générale de la Police, maache gelooss huet. Déi 13 Recommandatiounen, déi d'IGP gemaach huet, fir d'Datesécherheet bei der Police ze verbesseren, ginn an déi richteg Richtung.

"Mir wosste vun Ufank un, datt net alles am grénge Beräich wier" sot den CSV-Deputéierte Gilles Roth no der Kommissioun, zum Schluss hätt een awer geduecht et wier een duerch de Bësch. D'Reunioun um Donneschdeg de Moien hätt gewisen, datt dat net stëmmt.

Gilles Roth: Ech ginn Iech e konkret Beispill. Et ass eis virun 3 Woche gesot ginn, wann een e klassesche Protokoll géing kréie wéinst falsch Parken, an et géing een dee bezuelen, da géif dat net méi an engem Fichier opgelëscht ginn, de Fichier central. Haut gi mer da gewuer, dass dat zwar net méi am Fichier central steet, mä et steet dann an engem Fichier vun den Avertissements taxés an dat wann Dir e Protokoll bezuelt hutt, nach 48 Méint, dat heescht 4 Joer dono, obschonn Der bezuelt hutt. An de Sënn awer vun engem Avertissement taxé, dat ass wann Der bezuelt, dass déi "Strofdot" déi Der gemaach hutt, dass déi net méi opzeféieren ass.

De Gilles Roth iwwer Police-Fichieren

Et géifen ëmmer erëm nei Elementer op den Dësch kommen. Zum Beispill wier een en Donneschdeg gewuer ginn, datt, wann een en normale Protokoll hat an dee bezuelt huet, datt een dann nach 4 Joer an engem spezielle Fichier steet. Fir d'CSV bleiwen nach eng Rei Froen op.

De Gilles Roth: "En anert Beispill ass dat, datt mer mol net konnte gewuer ginn, ob, wann eng Persoun stierft, ob dann déi Donnéeën, déi iwwert si stockéiert sinn, sief dat Protokoller oder soss eppes, ob déi da geläscht ginn. Et stinn nach eng ganz Rei Froen op a mir verlaangen elo ee fir alle Mol, dass mer am Sënn vun enger gudder Zesummenaarbecht, dass all Fakten an Informatiounen op den Dësch kommen. Wéi soll ee soss an esou engem techneschen Dossier als Oppositioun konstruktiv matschaffen, wat wierklech eise Wëllen ass."

Eng vun de Conclusiounen, déi déi Lénk zitt a mat der IGP deelt, ass, datt d'Bewosstsinn an den Ëmgang mam Dateschutz an der Police op d'mannst ënnerentwéckelt ass, seet de Marc Baum.

Marc Baum: "Zum Beispill, datt a verschiddene Fichiere kee kloren Ënnerscheed gemaach gëtt tëscht relevante Fakten, déi no enger Enquête erauskomm sinn, a perséinlechen Aschätzunge vun den Enquêteuren, wat awer mengen ech en zimmlech wichtegen Ënnerscheed ass. Dat ass net kloer an de Fichieren demarkéiert. "

Reaktiounen op de Rapport IGP / Rep. Dany Rasque (5.12.19)

De Policeminister François Bausch, dee jo d'Etüd bei der IGP an Optrag ginn hat, ënnersträicht, datt déi Recommandatiounen elo opgeschafft ginn, esou wéi déi vun der Dateschutzkommissioun.

François Bausch: "Do sinn der dobäi, do muss legiferéiert ginn. Iwwert e Gesetz oder iwwert e groussherzoglecht Reglement. Et sinn der awer och dobäi, wou mer keng Gesetzer oder Reglementer brauchen, do musse mer vläicht Instruktioune bei der Police verbesseren oder einfach Decisiounen huelen, wat mer net méi wëllen."

D'Police soll sech nämlech sou séier wéi méiglech mam Gesetz iwwert den Dateschutz konform setzen. De gréissten Deel soll bis de Summer opgeschafft sinn, ënnersträicht de Minister.