De Premier Xavier Bettel hat jo refuséiert, dass hie Kontrakter tëscht dem Staat an RTL dem Deputéierte kommunizéiert.

D'Verwaltungsgeriicht huet sech en Donneschdeg an 1. Instanz, am juristesche Sträit tëscht dem Sven Clement an dem Xavier Bettel ëm Kontrakter vum Staat mat RTL inkompetent erkläert, fir sech mam Recours vum Deputéierte vun de Piraten ze befaassen. Dee krut och keng Indemnité de procédure zougesprach a muss fir d'Fraisen opkommen.

Bettel géint Clement a Saachen RTL - Reportage Eric Ewald

Am Oktober hat de Sven Clement d'Convocatioun vum Premier an eng Sëtzung vun der Chamberkommissioun vun der Digitalisatioun, de Medien an der Kommunikatioun gefrot. Den Deputéierte wollt do iwwer eng ugekënnegt Restrukturatioun bei RTL Group schwätzen a virun allem Abléck kréien a Kontrakter tëscht dem Staat an RTL.

Aus dem Procès-verbal vun där Chamberkommissioun vum leschte 5. November geet ervir, dass den Deputéierte seng Demande do widderholl hat. Doropshin hat de Premier erkläert, dass et keng eesäiteg Decisioun wär, fir de Membere vun der Kommissioun Zougank zu Dokumenter ze ginn, an deenen et ëm d'Verankerung vun RTL hei am Land geet. Et géif villméi ëm en Accord tëscht dem Staat an enger privater Gesellschaft goen, deen ënnert de Secret des affaires fale géif. An der nächster Sëtzung vun där Chamberkommissioun, eng Woch drop, hat de Xavier Bettel dunn, an Ofwiesenheet vum Sven Clement, deklaréiert, dass hie refuséiere géif, déi Dokumenter ze kommunizéieren, wéinst enger Vertraulechkeetsklausel doran. De Vertrieder vun de Pirate war dowéinst am Dezember op d'Verwaltungsgeriicht gaangen.

Deem seng 1. Riichter halen an hirem Urteel fest, dass sech am Kader vun där Refus-Decisioun d'Fro no der Kompetenz vum Verwaltungsgeriicht stellt. An deem Kontext sinn et d'Constaten, dass de Kläger kee Gebrauch gemaach hätt vu senge Kontrollméiglechkeete wéi enger parlamentarescher Fro oder enger Interpellatioun an dass déi entspriechend Handlunge vun der Regierung Akte wären, déi net an Ausübung vun der administrativer, mä vun der Regierungsfunktioun geholl goufen. Domat géife si eenzeg an eleng zur politescher Verantwortung vun der Regierung gehéieren. Sou Akte géifen der Kontroll vum Verwaltungsriichter entgoen, dee sech net an d'Relatiounen tëscht Parlament a Regierung amëschen dierft, wann hien de Prinzip vun der Gewaltentrennung net verletze wéilt.

Engem Deputéierten z'erméiglechen, fir e politeschen Akt vun der Regierung duerch e Recours ze kontestéieren, géif bedeiten, dass e Verwaltungsriichter e Konflikt tëscht Verfassungsorganer tranchéiere géif. Dobäi wär et net de Sënn an Zweck vun engem Recours, fir de parlamentareschen Debat mat anere Moyene weider ze féieren, e Recours, dee sou zu enger Waff vum Parlament géint d'Regierung géif ginn. Den Tribunal administratif misst sech dowéinst inkompetent erklären, fir sech mat dësem Recours ze befaassen. De Sven Clement hätt och keng Indemnité de procédure vun 3.000 € zegutt.

Weider Infoe ginn et op justice.public.lu