Firwat ass et schonn erëm just een eenzege Labo, deen am Kader vum Large-Scale déi gratis Covid-Tester däerf maachen? Dat freet sech de Bionext-Chef.

De Laboratoire Bionext vu Leideleng fäert ëm seng Zukunft, duerch déi nei Ausriichtung vum Large Scale Testing.

D'Regierung hat jo d'lescht Woch annoncéiert, datt een deemnächst keng Invitatioun méi brauch, fir an den LST ze goen, mä datt d'Leit sech, op Rendezvous, do gratis kënnen teste loossen. Tester, déi awer exklusiv vun de Laboratoires réunis gemaach ginn.

Et geet der Regierung virun allem drëm, deene Leit entgéint ze kommen, déi nach net geimpft goufen. Eng exzellent Iddi, seet de Chef vu Bionext, mä net esou.

Wann d'Leit sech do ouni Fraise kéinten teste loossen, géif jo kee Mënsch méi an déi aner privat Laboratoire goen. Bei Bionext huet ee fir e PCR-Test bis elo knapp 60 Euro bezuelt. Recetten, déi elo bannent ganz kuerzer Zäit, duerch d'Pläng vun der Regierung, kéinten ewechbriechen, seet den Dokter Jean-Luc Dourson a schwätzt vun enger Urgence, enger ganz kritescher Situatioun an déi seng Entreprise géif geroden.

Keng Covid-Aktivitéite méi ze hunn, bedeit, datt mer 80 Prozent vun eisem finanzielle Volume verléieren. An deem leschten annerhallwem Joer hu mer immens investéiert, a Material an a Personal, mir si vun 140 op méi wéi 200 Mataarbechter eropgaangen, fir dës sanitär Kris ze geréieren. Wann des Aktivitéiten vun haut op muer ewechfalen, ass dat dramatesch fir eise Fonctionnement an ech maache mer Suergen iwwert eng Restrukturatioun, déi dat fir eis Entreprise kéint hunn.

De Jean-Luc Dourson schwätzt vun deloyaler Konkurrenz an dat géif mat de Sue vum Steierzueler finanzéiert ginn.

Mir schwätze vu gratis Tester, mä si sinn net wierklech fir näischt. Si sinn ouni Fraise fir d'Bevëlkerung, mä et gëtt wuel een, deen dës Tester bezilt, an zwar ass dat de Steierzueler. Et ass de Staatsbudget, deen dem Laboratoire dës Tester rembourséiert. Aktuell gëtt et een eenzege Laboratoire, deen dovunner profitéiert.

De Jean-Luc Dourson huet dofir en oppene Bréif un d'Gesondheetsministesch d'Paulette Lenert geschriwwen, mat der ganz klorer Demande "dofir ze suergen, datt dës Tester, déi fir d'Populatioun ouni Fraise sinn, net just am LST kënne gemaach ginn, mä an all de Laboratoiren. Wann dat d'Volontéit vun der Regierung ass, ënnerstëtze mer dat zu 200 Prozent, mä mir kënne keng ongläich Behandlung ënnerstëtzen, déi géint d'Konkurrenzreegele verstéisst."

D'CSV huet och an deem Sënn eng dringend parlamentaresch Fro un d'Gesondheetsministesch gestallt a wëll zum Beispill vun hir wëssen, firwat d'Leit sech net gratis am Laboratoire vun hirem Choix kënnen teste loossen.

LST-Kritik vu Bionext / Reportage Dany Rasqué