Wéi et vum OGBL heescht, hätt een d'Majoritéit an deene Secteuren, déi direkt um Gehälterofkommes fir den ëffentlechen Déngscht mat drunhänken.

D'Negociatioune fir de Gehälteraccord an der Fonction Publique sti virun der Dier an den Onofhängege Gewerkschaftsbond wär do gär dobäi.

Dat huet den OGBL en Dënschdegmoien nach eng Kéier decidéiert gefuerdert. Op eng entspriechend Demande hätte si vum zoustännege Minister nach keng Äntwert kritt.

Am ëffentlechen Déngscht ass d'CGFP déi Gewerkschaft, déi dominéiert. Allerdéngs hätt den OGBL d'Majoritéit an de Secteuren, déi direkt um Accord salarial am ëffentlechen Déngscht drun hänken: d'CFL oder de Fleegesecteur. Awer och zum Beispill bei de Gemengenaarbechter. Am Ganze wären 41.000 Persounen un dëse Gehälteraccord gebonnen.

Fir d'Remuneratioun an anere Secteuren, wéi dee vun der Héichschoul an der Fuerschung, misst nees e Lien mam Gehälteraccord beim Staat etabléiert ginn, esou den Onofhängege Gewerkschaftsbond.

Den OGBL fuerdert eng Punktwäert-Erhéijung an der Fonction Publique vu 5 Prozent. Dat rechtfäerdegt ee beim OGBL domat, dass déi allgemeng Lounentwécklung den Zuele vum Statec no bei iwwer 6 Prozent léich. Mat enger Punktwäert-Erhéijung beim Staat géing d'Schéier tëscht Salaire beim Staat an deenen am Privatsecteur net méi wäit ausernee goen. Am Géigendeel: aus Siicht vun de Leit aus der Fonction Publique géif een e Réckstand par rapport zu der allgemenger Lounentwécklung ophuelen. Eng gewëss Jalousie géintiwwer de Paie beim Staat léisst de Frédéric Krier net gëllen.

 "Et kritt ee jo awer net méi, wann dee beim Staat näischt bäikritt. Et ass souguer de Géigendeel. E weidere Lounstopp an der Fonction Publique géif dozou bäidroen, dass de Mindestloun sech méi lues géif entwéckelen. Dee gëtt nämlech op der allgemenger Lounentwécklung berechent. Da fält den Ajustement och méi niddreg aus, wéi wa mir an der Fonction Publique d'Salairë géifen erhéijen".

Extrait Frédéric Krier

Virop d'Eisebunner hunn d'Nues voll. De Georges Merens vum Landesverband huet den zoustännege Minister Marc Hansen invitéiert, fir mat him zesumme bei d'CFL-Personal op den Terrain schwätzen ze goen. Mä de Gewerkschaftler huet och eng syndikalistesch Alternativ proposéiert.

"Ech war leschte Méindeg um 24-Stonne-Streik vun der Bunn an Éisträich. Mëtt der Woch waren déi Belsch drun an de Weekend d'franséisch Kolleegen. Déi hate sech all Zäit geholl. Wann de Minister wëll, dass mir Eisebunner eis och eng Kéier 24 Stonnen Zäit fir hien huelen, da musse mir dat maachen. Et hänkt vun him of. Awer och un enger CGFP, déi blockéiert, wann et drëms geet, ob mir kënnen do mat schwätzen oder net".

Extrait Georges Merens

Och CGFP fir Erhéijung vum Punktwäert

Och d'CGFP hat sech jo fir eng Erhéijung vum Punktwäert ausgeschwat, sot allerdéngs nach net ëm wéi vill. De Minister vun der Fonction Publique Marc Hansen hat an dësem Zesummenhang hei op RTL erkläert, dass d'Gehälter beim Staat misste korrekt sinn, ma dat wiere se och. Hien huet "kreativ" Léisungen annoncéiert.