En Donneschdeg de Moie war de Minister fir d'Fonction publique eisen Invité vun der Redaktioun.

De Minister fir d'Fonction Publique Marc Hansen huet en Donneschdeg de Moien hei op RTL "korrekt Paien" beim Staat verdeedegt. Gläichzäiteg huet hie betount, datt se a ville Fäll "korrekt" wieren. Aus enger Etüd vu sengem Ministère ass ervirgaangen, datt d'Beamten am Schnëtt 8.688 Euro Brutto de Mount verdéngen, mam 13. Mount mat aberechent.

De Minister huet präziséiert, datt 60 Prozent vun de Beamten an den ieweschte Karriären (A1 an A2) sinn, mat Bachelor oder Master. Hie wier och frou "alleguer déi gutt Fonctionnairen ze hunn an och an deenen anere Karriären", déi fir "wichteg Missiounen" a fir e "gudden ëffentlechen Déngscht" zoustänneg wieren.

Wat d'Fuerderunge vun de Gewerkschaften ugeet, fir d'Léin am nächste Gehälteraccord an d'Luucht ze setzen, huet de Minister sech net vill an d'Kaarte kucke gelooss. Den aktuellen Akkord leeft Enn vum Joer of, mee d'Verhandlunge sinn nach net ugaangen.

De Marc Hansen sot awer schonn, hie géing mat vill héije Beamte schwätzen an déi wiere "genéiert" wa se héieren, datt d'Gewerkschaften elo eng Hausse vun de Léin verlaangen. Eng Hausse vu 5 Prozent, sou wéi den OGBL fuerdert, mam Argument d'Beamten hätte 5 Joer laang keng Punktwäerterhéijung kritt (ofgesi vu normalen Avancementer an de Karriären), dat géing bei den Duerchschnëttsléin vu Beamte 450 Euro de Mount méi bedeiten, sou de Marc Hansen.

Op déi méi niddreg Karriären a Léin beim Staat ugeschwat sot de Minister, et misst een d'Verhandlungen ëm en neie Gehälteraccord beim Staat an den aktuelle schwieregen Zäiten "vill méi kreativ" ugoen, ewéi an der Vergaangenheet. D'Verhandlunge wäerten awer – esou ewéi hien et eegenen Aussoen no gär huet – hanner zouenen Dieren an aller Rou gefouert ginn.

Op d'Fro, ob d'Publikatioun vun der Etüd als Drockmëttel am Virfeld vun de Gehälterverhandlunge publizéiert gi wier, huet de Minister erkläert, datt 2011 d'Etüd decidéiert gi wier an se eben elo fäerdeg ginn ass. Dat wier och scho virdru gewosst gewiescht: d’Chamber an d'CGFP wieren informéiert ginn, sou de Marc Hansen.

Hie sot um Schluss vum Interview nach et misst ee vläicht ophalen, just doriwwer ze schwätzen, wie méi oder manner huet. Am Moment wier et a sengen Ae nämlech fir keen einfach.

Invité vun der Redaktioun: Marc Hansen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.